Bə Eko uzv bıə kişvəron İroni 13 milyard dollardə ixracat

İroni qomroki yol, bə Eko uzv bıə kişvəron İroni 13 milyard dollardə ixracatiku xəbəş do.

 İğtisodi həmkoəti təşkilot (Eko) ıştə ko əvvələdə de İron, Tırkiyə və Pakistoni həmkoəti və de məntəğə milləti iğtisodi jimoni səthi barz kardey hədəf icod bıə.

Əfğanıston, Tacikiston, Azərbaycan Respublika, Ozbəkiston, Tırkəməniston, Ğəzaxıston və Ğırğizıston həm həminə soron bəpeşt bə ım təşkilot əlovə bıə.

İroni qomroki yol, Muhəmməd Rezvanifər ijən votışe: şəmsi 1401 minnə sorədə, bə Eko uzv bıə kişvəron İroni ixracat 13 milyard dollar və ım kişvəronku varid bıə məhsulon 7 milyardo 500 milyon dollar rəsə.

Bə İrna raporti əsos, Rezvanifər de Eko sərkatib Xosro Nazeri vindemonədə elanış kardə: dəvardə sorədə İroni ticori erj de Eko uzv bıə kişvəron 20 milyardo 500 milyon dollar be, əv ijən əlovəş kardə: İroni qomrok hozzoş heste ta Ekouzv bıə kişvəron proqonozon hədəfon bə vırə rosniyero və bə Eko sazışon əsos, ticori və tranziti mıbodiləon mığdori əlovə kardeyədə lozimə həmkoətion əncom bıdən.