Mıştərəkə dıyovonəti şirkəti təsis kardeyro İron və Rusiyə miyono muzakirə

Rusiyədə İroni səfir, mıştərəkə dıyovonəti şirkəti təsis beyro de Rusiyə muzakirə kardeyku xəbəş do.

Rusiyədə İroni səfir Kazım Cəlali de "Rusiyə 24" nomo kanali mısohibədə votışe: holihazırədə, 2 qılə kişvər qıləy dıyovonəti mıştərəkə kompaniya icos bey imkoni barədə de yande votımon kardedən.

Bə Cəlali votə əsos, de İron və Rusiyə bəndəron inkişofi həmzəman, bəpe 2 qılə kişvəri dıyovonəti flot həm zumand bıbu və lozime ki 2 tərəfi miyono qıləy mıştərəkə dıyovonəti həm icod bıbu.

İroni ım diplomatiya ijən təsdiğış kardə: de Rusiyə iminnə vəziri muavin, Andrey Blosofi vindemonədə, dıyo həmkoətion hevujəti barədə vey sıhbət bıə və Rusiyə rəsmi şəxson həm qıləy  mıştərəkə dıyovonəti kompaniya icod beyku ıştən himoyə elanışon kardə.

Rusiyədə İroni səfir ijən votışe: de porton inkişof və bə reylz xətton çəvon dəçokney,2 qılə kişvəri miyono və dıyo royku şələ kırniye zərfiyəti əlovə peydo bəkay.

İron və Rusiyə 2tərəfi muxtəlifə zəminəonədə xususi iğtisodi, hərbi, əmniyyəti və həmçınin məntəğə və beynəlxalğə məsələon barədə bənə de Amerkə unilateralizm muğabilə kardey strateqiya mıştərəkə mənafe soybin və dəvardə soronədə ım amilon, 2tərəf nezə həmkoətion vey muhimmə amilonku be.