İron və Tacikiston 18 qılə həmkoəti sənəd imzo kardışone

İron və Tacikistoni ali rəsmi şəxson, 2 qılə kişvəri prezdenton iştirokədə 18 qılə sənəd iyən təvafuğnomə imzo kardışone.

Bə İran Peres aqentiyəti raporti əsos, İron İslom Respublika və Tacikistoni miyono həmkoətiyon sənədon imzo kardey mərosimədə, 2 qılə kişəvron prezdenton, Seyd İbreym Rəyisi və İmoməli Rəhman, 2tərəfiyə dırozmıddət və stratejikə nığılə rabitəon mıştərəkə bəyoniyə imzo kardışone.

Im həmkoəti sənədon əcumlə Milodi 2023 tosə 2030 minnə soronro, dıroz mıddətə iğtisodi və ticori həmkoətion roy plani təvafuğnomə, viza ləğv kardey, de narkotin maddon ğaçaği mubarizə bardey, nəğliyot və tranzit, behroni mudiriyət kardey, mıştərəkə ozodə məntəğə icod kardey, mədəniyət və hınə, ali təlimon, texnoloqiya təhğiğon, posti xıdməton, varzışi koon, İroni Yəzd və Tacikistoni Xəcənd şəhron miyono bıvəti icod kardey şomil bəbe.

Im həmkoəti sənədon İron İslom Respublika xarıci, mədəniyət və enerji vəziron de Tacikistoni iğtisod, mədəniyət, məaref, nəğliyot və senaət vəziron miyono imzo bıə.

Zinə çoşəmbə, İron İslom Respublika prezdent Seyd İbreym Rəyisi bə Tacikistoni prezdenti rəsmi dəvəti əsos deştə heyəti bə ico bə ım kişvər səfəş kardə.