Nardarani hadisə məhbuson məhkəmədə hesıbes eqıniə
Boku şəhəri qonə cinayəton məhkəmədə Nardarani hadisə məhbuson muhakimə dəvom kardəşe. Polis nəfəron həm zərərdidə, həmən bənə şohidi ifadə doəşone. Sabunçi rayoni polis idarə həmkaron votəşone ki, 2015-minə sori noyabri 5-ədə bə Elçin Ğasımovi dəstqir karde etiraz kardəkəson bəvon həmlə kardəşone, sığ ğandəşone, çəvon toskolo və sipər arıştəşone.
Məhbuson və çəvon vəkilon bəvon sualon doəşone, əmo əvon bə sualon cəvob doe əvəzi məhbusonşon təhdid kardə. Elçin Ğasımovən bə hakimi votəşe ki, ımon məhkəmədə ıştəni jıqo bardedən, bini idarədə bəmə kom zulmon kardəşone. Hakimi bə polison əlavə sualon doe imkan doəş ni.
Apreli 4-minə ruji Nardarani diqər qrupi məhbuson məhkəmən dəvom kardəşe. Qəncə şəhəri polis şebə həmkaron ifadə doəşone. Çəvonədə Oğtay Orucovi votəşe ki, quya məhbus Ruzi İsmayılovi dəstqir kardeədə ey de qumbara bə çey dimi zərbə jəşe. Əmo ey bə İsmayılovi vəkili əlavə sualon cəvob doe zınəşni. Imən bə məhbuson etirazi səbəb bıə. Elman Ağayevi bey votəşe ki, "bə sualon cəvob doe zındəniş, bəs boçi bə çəmə dim mandedəş?" Vəkiliən çeyku xəbə səşe ki, cey ısətnə votəyon, de istintaği ifadon boçi bə yəndı əksin. Eyən votəşe ki, bə vaxi jəqo votəme, ısət jıqo votedəm. Hakimi bə çey ım votəyon məhəl noəş ni. Diqər polis həmkari bə dini fəalon "vəhhabi" nom noe bə məhbuson ciddi etirazi səbəb bıə. Çəvon de polis həmkari arədə təhğiramiz hesıbes bə əməl omə . Məhkəmə iclasədə iştirak kardəkəsonən bı vəziyyəti ıştə etiraz votəşone. Hakimi əvon çe iclaso bekarde ğəror doəşe. İlahiyyatçi Zulfiğar Mikayilzadə bə hakimi votəşe ki, ım -37-minə sori repressiyon dəvome. De əmə bənə erməniə əsiron rəftor kardedəyon.
Məhkəmə aprelə manqi 7 və 10-minə rujonədə dəvom bəkarde.
