Pokiston: bə Fələstini avarəon israili həmlə, beynəlxalğə prinsipon təhğir kardeye
Pokistoni xarıci vəzorətxonə Rəfəhədə bə Fələstini avarəon çadoron sionist rejimi həmləon məhkumış kardə və ım həmlə ım hırdənəkıştə rejimi səmtiku beynəlxalğə prinsipon oşkoə təhğir zınəşe.
Bə İrna raporti əsos, Pokistoni xarıci vəzorətxonə de qıləy bəyoniyə muntəşir kardey elonış kardə ki bəpe, Rəfəhədə israili veyə təcavuzon de İ Bıə Milləton Təşkiloti vositə vəy bıqəto, ım vəzorətxonə ijən elonış kardə ki bə Fələstini avarəon həmlə kardey de israili vositə, humanitarə beynəlxalğə prinsipon darşiye şomil bıdə.
Pokistoni xarıci vəzorətxonə ijən de təkid bə ım ki bəpe Ğəzzə tanqədə molki şəxson komil surət mıhofizə kardeyro tədbir bıbu və Ğəzzə qenosid kardey vədə israili işğolçiyə ğıvvon cəvob bıdən ijən təsdiğış kardə: israili işğolçiyə hərbion co kərə subit kardışone ki çoknə beynəlxalğə prinsipon beynəlxalğ ğəbul kardəninə rəftor və bəşərdustanə vey muhimmə prinsipon təhğir kardedən.
Zinə şəv, sionist rejimi təcavuzkorə ğırəkə təyyorəon Ğəzzə tanqə cənubədə Rəfəh şəhri şimol ğərbədə Fələstini avarəon çadoron bombardımon kardışone.
Bə Ğəzzə tanqədə Fələstini devləti məlumatərosnə ofisi eloni əsos, dəvardə 24 saəti mıddətədə israili tom bıriyə rejimi ərtış Rəfəhədə 10 qıləku vey Fələstini avarəon kmpi bombardımon kardışone ki çəy cərəyonədə 190 nəfəriku vey Fələstini millət şəhid bıən.
