İroni səfir de Tırkiyə-İron parlamentə dustiyəti qrupi rəhbəri bıə dido 

İroni Tırkiyədə bıə səfir helikopter fociyədə çe İron İslom Respublikə prezdent iyən əy mışoyiət kardə heyəti şəhid bey bədiqə,Tırkiyə-İron parlamentə dustiyəti qrupi sədri və çın kişfəri Van şəhri nımoyəndə həmdardi kardey xoto ğədrdonətiş kardə.

İron İslom Respublikə həştminə prezdent Seyd İbreym Rəyisi işambə ruji(19 may)İroni şimol-ğərbədə Ğız Ğaləsi ovə bandi ojbemoni mərosimiku oqardeyədə bə həvo fociyə məruz mande ki,çe vertəlyoti eqıniye nəticədə Əv,xarici koon vəzir Huseyn Əmirəbdullahiyan və de digər həmroon bə ico,bə barzə şəhodəti məğami rəsin.

Bə Tele-Rədyo xəbə aqentəti doə məlumoti əsos,İroni Tırkiyədə bıə səfir Məhəmməd Həsən Həbibzodə de Tırkiyə-İron parlamentə dustiyəti qrupi rəhbəri Ayhan Tırkmənoğli bıə didoədə voteşe ki,İron İslom Respublikə prezdent iyən əy mışoyiət kardə heyəti helikopteri bə fociyə mə`ruz mandey bədiqə,de Tırkiyə millət iyən hukuməti bə İroni milləti bıə rəğbət ifodə kardey,bə ın dardnokə zəxmi təsəllişon doe.

Tırkiyə-İron parlamentə dustiyəti qrupi rəhbər həmçinin çı İroni mərhumə prezdenti Seyd İbreym Rəyisi dəvardə yanvarə manqədə bə Tırkiyə bıə səfəş bə yod dənoe və bəyonış karde ki,bın səfə zəmonədə Ankara de Tehroni miyono mıxtəlifə ixtisodi iyən mədəni sahəonədə,min cumlə mevcudə həmkoətiyon zumand kardero dəvəşə noiliyyətonış kəsb kardə.

İron İslom Respublikə prezdenti helikopterə fociyədə bıə şəhodəti bəpeşt,Ayhan Tırkmənoğlu və çı Tırkiyə-İron parlamentə dustiyəti qrupi uzvon,bə İron İslom Respublikə Ankaradə bıə səfirəti omən və  səbəsəloməti doəşone.İroni prezdent iyən əy mışoyiət kardə heyəti şəhid bey bədiqə,Tırkiyə hukumət kişfəri qırd vırədə I rujnə matəm elon kardəşe.