Az. R dini məhdudiyyəton ən vey mevcud bıə devləton restədəy

"Azadlıq.info" sayt xəbə dodə ki, Az.R 2015 -minə sorədə bə dini məhdudiyyət noə "ən barzə kateqoriya" devləton arədə vırə qətəşe. Dınyo devlətonədə bə ım mevzu dair tədğiğat "Pew" nominə Tədğiğat Mərkəzi bardəşe, Boku hokuməti bəştə şəhrvandon dini fəaliyyəti munasibəti ım curə ğıymət doəşe. Imən çe İ. Əliyevi tolerantəti həxədə bardə təbliğati dınyo ictimaiyyəti tərəfo bovə nıkarde nişon dodə.

"Hacı Cavad" məçiti ətrofədə vağeə bıə hadison Milli Məclisədə muzakirə kardəşone. Deputat Fazil Mıstəfo, Siyavuş Novruzov hokuməti mevğe mudafiə kardəşone, Ğudrət Həsənğuliyev  bə xalqi ım mubarizə ıştə mənfi munasibət tikiən oşko bə biruz doəşe, votəşe ki, "bə polisi muğavimət nişon doə de dini fəalon bəpe Devlətə Əmniyyətə Xidmət məşğul bıbo. Az əminim ki, çəvon de co məmləkəti kəşfiyyat orğanon obast hestışone. Əmə imkan ədənimon ki, məciton bə casusə lonə peqardo".

Bə xalqi ıştə huğuği muhafizə kardə fəaliyyəti Parlamenti deputaton tərəfo ım curə neqativ reaksiya, hakim zumrə çe şiə fəalon vədə çanədə bə xof dəqınie numayiş kardedə. 

"Azadi radio" sayti xəbə pevolo kardəşe ki, İ. Əliyevi de "Haci Cavad" məçiti əlağədar komissiya təşkil karde barədə dəstur doəşe. Im məçiti icma sərdar Kənan Əzizovi bə radio muxbiri votəşe ki, icma uzvon de prezidenti ım ğərari rozin və ıştə etirazə aksiya dəparçıniəşone.