Çe Əliyevi sosial devlət

Prezident İlham Əliyev həmişə votedə ki, Az.R sosial devləte. Çoko ki, çey сo votəyon məmləkətədə devləti bardə bə real siyasəti muvafiğ bedəni, ım fikirşən çe real vəziyyətiku xeyli fərğ dodə.

Pensiya sınni bə 65 ros karde, sosial muavinəton sorbəsor bə kam , bə bekorəti qorə muavinəti bə çuzi odəmon şamil karde və bənə bımon həniən co tədbiron Əliyev hokuməti çı curə sosial siyasət barde nişon doə əlamətonin. 

Suraxani rayoni Hevsan ğəsəbədə didərqnə ailon məskun bıə qıley umumiə hıtəxonə jıqo ğəzaninə vəziyyətədey ki, əyo jimon karde həni ğeyri-mumkune. Çəvrey ailon boştə çodo jəşone ovəştən, bino kardəşone çodoədə jimon karde. Digərqin Ziya Əhmədovi bə "Azadi radio" votəşe ki, hokumət bə çəvon ım problemi çarə nıko, cəvon bina həmə ailon boştə çodo ebəjen, kuç bəkarden çə binaku. İntizar Vəliyevan votəşe ki, bə hokuməti çand qılə təşkilaton şikayət kardəmone, hiç qıley foydə bə nişe. Fevğəladə Halon Vəzarəti numayəndə ome, bina ğəzaninə, bo jimoni bə vəc nomə vəziyyətədə bıe ğeyd kardışe. Əmo hiç qıley əməli tədbir nıvindışone. 

Çimi həfteyi bə nav Mərdəkon ğəsəbə pansionatədə məskun bıə  didərqinonən bə jıqo qıley tədbiri dast ğandəşonbe. Bə Radio muxbiri de ım məsələ əlağədar muraciəti çe Didərqin və Məcburi Pənahədəyon dair Devlətə Komitəku cəvob  se mumkun bıə ni. Suraxani rayoni İcra Hakimyyətədə votəşone ki, çəvon numayəndon də həmonə didərqinə ailon vindemon kardəşone, imkan bəcəğin əvoni çə ğəzaninə binaku bə tojə mənzilon obəvoştonen.

Boku hokuməti "Poy Xəritə" planədə Boku 5 mərtəbəninə binon oçınie, bımiyo çanədə devlətə budcə vəsaiti xarc karde nəzərədə qətedən. Əmo ım benəsibə ailon ocizanə vəziyyət bə İlham Əliyevi hokuməti yod dəşedəni.