Az.R iğtisadiyyati inkişafi kom problemon hestışe

Prezident İlham Əliyevi bə məmləkəti ım sornə 3 manqi sosial-iğtisadi inkişafi dair Naziron Kabineti iclas dəvunişe. Bənə nafkonə jıqo məşvərəton ım iclasədən iğtisadiyyati hiç qıley problemiku qəp nıjənışone. Prezidenti ıştə votəyon həmə bə pozitiv məğamon həsr kardışe ki, bəs idxal bı 3 manqədə bə kam, ixrac vey bıə, 85 həzo tojə koə vırə oj kardəşone, çəvon 70 həzo qılə daimi koə vıronin.

Əmo Respublika iğtisadşunason bə çey votəyon de bədbinə nəzəri diə kardedən. "Azadlıq.info" ekspert Nemət Əliyevi fikron bəştə əhandon rosniəşe. Ey votəşe: "Devlətə Statistika Komitə elan kardəşe ki, de mıjdi koəkon miğdar ımsornə 3 manqədə bə 1 milyon 515 həzo 700 nəfəri rəsə. Ponə sori orəxədə ım rəğəm 1 milyon 514 həzo nəfər be. İm rəğəmonku jıqo məlim bedə ki, ya ım sori 3 manqədə daimi koə vıron miğdar cəmi 1 həzo 700 qılə ziyod bıə, yainki Prezidenti votə 70 həzo daimi koə vıron 68 həzo 300 qılə ğıssə muddəti bə peştə ləğv bıə. Yanvar və fevralə manqonədə ğeyri - natə sektorədə, əhali pul mədaxilonədə, aqrar sektorədə, xarici ticari devriyyədə mənfəəton bə kam bıən. Bı səbəbən devləti sərdari bə iğtisadi inkişafi dair votəyon az şək bardedəm. Çey votə rəğəmon de real jimoni hiç qıley obast nişe".

İğtisadşünas Ğubad İbadoğluən bə Meydan TV votəşe ki, Respublika İğtisadiyyati çe behraniku beşe barədə qəp je hələ rəy. Prezidenti nişon doə miğdarədə tojə koə vıron oj karde barədə votəyonən hiç qıley iğtisadi əsas nişe.