Az.R -ədə məmuron budcə pulon çı cur xarc kardedən

Ponə sori iğtisadi behrani qıvoninə vaxtədə budcə nırəsey çe arə barde ro, MM xeyli tojə ğanunon ğəbul kardışe, ey pur karde bə sodə zəhmətkəşon qiy noşe. Bəvədə ali hokuməti məmuron daima zənqulə jedəbin ki, hokumət həni devləti puli de ğənaəti xarc bəkarde.

Respublika İğtisadiyyat Vəzarəti 2016-minə sori Mərkəzi Entexabatə Komissiya devləti vəsaiton xarc karde barədə hesabat dərc kardəşe. Bə hesabatədə ım devlətə orğani budcə pulon çı curə ğarət karde oşko bedə. "Azadlıq.info" nıvıştedə ki, 100 dollarə əskinasi hozo karde bə 15 sent bə sə omedə. Əmo MEK ponə sori Referendumi aqahnamə ki, ulquş həmonə 100 dollarə əskinasisən qədəlie, bə 25 kopiq doəşe hozo  karde. Bo muğayisə ro bıvotəmon ki, haliyyətədə Boku məğəzonədə 12 vərəğinə dəftəri ğıymət bə 15 kopiqe. MEK bo 1 qılə bulleteni 1 mənot 72 kopik pul xarc kardəşe. De ım ğıyməton həmonə Referendum bo budcə bə 22 milyon mənot bə sə omə. Sayti muxbiri bə Boku şəhəri qıley mətbəə muraciət kardəşe. Mətbəə rəhbəriyyəti votəşe ki, jəqo bulleteni bə 15 kopiq, aqahnomə bə 3 kopik çap karde bo çəvon muəssisə sərf kardə ğıyməte. Muxbir bey voteədə ki, bəs MEK  ım sənədon təğribən 10 bəjəm bə bohoə ğıymət hozo kardəşe, ey cəvob doəşe ki, "bə jəqo məzənnə qorə odəmi de qolulə bəjen"

Im cur bədxarciəti çe devləti co orğanonədən, məsələn, Az.R Latviya səfarətədən  mevcud bıə. "Azərbaycan saatı" proqram bə çimi dair konkret sənədon numayiş kardəşe.

Bımi, həmən bənə bımi Respublika KİV-onədə dərc bıə çanədə fakton Boku hokuməti hiç qıley cəvob doə nişe. Jıqo qıley məsəl heste: "Damə nıbe - roziəti əloməte"