Qəncə şəhərədə əzon ğədəğən karde pidəşone

Aprelə manqi 19-ədə Qəncə şəhəri Şah Abbas məçitədə çoştə nomoji əzon nıdoe şəhəri imon əhliş norohət kardə, əvon omən bə məçit ki, çimi səbəbi omuton. Şəhəri sakin Abbas Şərifovi bə "Azadi radio" votəşe ki, "bəmə votışone, ım çe İcra sərdari dəsture, ey məcitədə əzon doe ğədəğən kardəşe. Əmənən bə ğərar omimon ki, şomi nomoji əzoni çəş bıkəmon. Polison ımşon məse- omin de zori bino kardışone əmə çe məçito beğande"

"İslamazəri" sayt xəbə dodə ki, bə vaxti Qəncə şəhəri polis rəisi muavin İlğar Balakişiyev de tufli dəşə bə məcit, əzoni sədo bırie piəşe. Çimi səbəb dey izah kardəşe ki, ım, şəhəri İcra hakimiyyəti sərdar Elmar Vəliyevi norohət kardedə. De ım məsələ əlağədar sayti muxbiri de Qəncə şəhəri İH əlağə bastəşe. Çəvrey rəsmi şəxs Kənan Məmmədovi ım fakt təkzib kardəşe, votəşe ki, Qəncə şəhərədə əzoni ğədəğən karde mumkun nıbə koe.

Apreli 14 və 17-minə rujonədə Nardarani hadisə məhbuson muhakimə dəvom kardəşe. Polis nəfəron bənə şohidi ifadə doəşone. Navonə məhkəmə iclason ğəzinə, bı iclasonədən hakim vəkilon hiç qıley vəsadət təmin kardəş ni, polison votəyonədə bə ziddiyyətinə və dıvuə ifadon əhəmiyyət doə nişe.

Boku Apellyasiya Məhkəmən çe İlahiyyatçi Elşən Mustafaoğlu 10 sornə zindonə cəza ğərari dair şikayət təmin kardəş ni, həmonə ğərar ğuvvədə oqətəşe.

Nardarani hadisə məhbus Abbas Huseyn bə Respublika huğuğ mudafiəçion muraciət vışandəşe. Əv zindoni koəkon de məhbuson vəhşiə hərəkəton, bəvon işqəncon doe barədə bə ictimaiyyəti məlumat rosnie çəvonku xahiş kardəşe.