Boku hokuməti idxal-ixracə siyasət

Prezident İlham Əliyevi Yevlax şəhərədə apreli 17-minə ruji qıley muşavirə dəvunişe. Əyo ğeyd kardışe ki, məmləkəti iğtisadiyyatədə ixracat 50% ziyod bıə.

De ım məsələ əlağədar "Azadi radio" sayti İğtisadi Tədğiğaton Mərkəzi məlumaton dərc kardəşe. Im mərkəz ğeyd kardedə ki, bə məmləkət idxal bıə məhsulon i hissə ixrac kardedən. Məsələn, ım sornə 3 manqədə bə keşvər 100 həzo ton mivə-tərəvəz idxal bıə, çey 55 həzo ton bə ixrac vığandəşone. İdxal bıə 2 həzo 600 ton çay 70% , 81 həzo ton ğəndi  13 həzo ton bə xaric vığandəşone. Mərkəzi ekspert Vahid Məhərrəmovi votəşe ki, 2017-minə sori 3 maqnqədə bə ponə sori muvafiğ devri nisbətən bə məmləkət qujdi idxal 230%, şıti idxal 81%, ruəni idxal 25%, şəkəri idxal 94% ziyod bıə. Hokumət ım məhsulon i ğismi bə xaric vığande sayədə Az.R iğtisadiyyatədə ixracati ziyod bıe imitasiya bə əməl vardedə.

"Azadlıq.info" saytən hokuməti  bekorəti 5% be dair votəyon de Devlətə Statistika Komitə məlumaton vasitə təkzib kardəşe. İm Komitə elan kardəşe ki, məmləkətədə ko ğabiliyyətinə əhali miğdar 6 milyon 200 həzo, de koy məşğul bəkəson isə 4 milyon 670 həzoe. Ali və miyonə təhsil muəssisə tələbon 225 həzo nəfərin. Əmandənə 1milyon 300 həzo nəfər ko ğabiliyyətinə odəmon bekorən. İmən keşvərədə bekorəti 21% be nişon dodə. Naziron Kabineti sədr Artur Rəsizadə isə məmləkətədə bekorəti  səviyyə hətto bə 4,9% eqıne bəyon kardəşbe.

Hokumət çanədə məmləkətədə iğtisadi inkişafi imitasiya bıko, anədə zəhmətkəşon quzəran rujbəruj həniən qıvonin bəbe.