Ğıyməton suni boho karde vəy çokne se bəbe?

Az.R -ədə ərzağ və sənaye məhsulon ğıymət bə ətrof məmləkəton nisbətədə xeyli bohoe. Prezident Əliyevən ıştə votəyonədə çand bəjəm çəşnavi kardəşe ki, de ğıyməti suni roskardəkəson mubarizə barde lozime. Əmo çey ım votəyonədə hiç qıley musbət nəticə hasil bedəni.

"Korrupsiya.az" sayt de ım problemi əlağədar nıvıştedə ki, de  bə sahibkaron təzyiği  kam karde nomi hokuməti 2015-minə sori bə 3 sornə muddət çəvon müəssison təftiş ğədəğən kardəşbe. İmən vıjoronədə həm bə bekeyfiyyətinə məhsulon, həmən ğıyməton ziyod be səbəb bıe. Isət hokumət sənibəton həmon təftişon bərpo karde pidəşe. İğtisadşunas-eksperton fikir jıqoe ki, ımi səmərəş nibəbe. Çunki vıjoronədə məhsulon keyfiyyət və ğıyməton səviyyə iqlə de nəzarət və təftişi ne, həmən de rəğabət muhiti soxte təmin karde mumkune. Im fikir Natiğ Cəfərli bə "Cumhuriyyət" rujnomə votəşe. Həmən əlivə kardəşe ki, vıjorə iğtisadiyyatədə bənə Soveti devri sosialist iğtisadiyyati ğıyməton de inzibati roy bə səhmon varde ğeyri-mumkune. Im problemi yekanə təbii həll kardə ro əve ki, daxili və xarici ticarətədə monopoliya ləğv kardə bıbo. Əmo hokumət bı roədə nəinki hiç qıley əməli ko kardedəni, hətto ıştə monopolistə siyasəti tikiən zumand kardedə.

"AzTuday.az" sayt xəbə dodə ki, AZAL aviaşirkət çe Respublika həmə aviareyson bəştə monopoliya ji dənoə siyasəti dəvom kardedə. Əv çe Turkiyə "Pegasus" aviaşirkət çe Azərbaycano beğande nail bıə. Çand sorone ki, AZAL co aviaşirkəton bə Azərbaycan ome imkan dodəni. Demiən aviareysion bəştə inhisar səşe, çəvon bileton ğiyməti ıştənbəsə vey bohoə səviyyədə muəyyən kardedə.