Milli Məclis məmləkətədə dini fəaliyyəti həniən məhdud kardedə.

Bə Nardarani və digər reqionon dini fəalon divon qəte bəpeştə, Milli Məclisi, dindaron huğuğon məhdud karde ro çand qılə murtəce ğanun ğəbul kardışe.

"Azinform.az" sayt xəbə dodə ki, Parlamenti bə Dini təşkilaton dair Komitədə bə " Dini etğadə azadi həxədə" ğanuni qıleyən əlavə muzakirə bedə. Təklif heste ki, məmləkətədə əcnəbion, həmən şəhrvandəti nıbə odəmon dini təbliğat barde ğədəğən kardə bıbo. Im təklifi əsas murtəce məğsəd çımədə ibarəte ki, bənə Şeyx Sərdari nufuzinə odəmon bə zindon dənoe ro ğanuni əsas bısoxto. Əqər çimi bəpeştə kom dini xadim bə hokuməti xoş nomə təbliğat bıbo, sıftə ey çı şəhrıvandətiku məhrum bəkarden, çəyo dəbənon bə zindon. Im ğanunədə qıley istisna heste, əvən çımədə ibarəte ki, xarici dini xadim çe devləti dini mərkəzi tərəfo dəvət be təğdirədə dini mərasmon idarə karde ixtiyarış bəbe.

"Nur-az.com" saytən bə "7sabah.com" sayti istinadən de Az.R islamə məhbuson həmrayəti ruji munasibəti çe dınyo azərbaycanıjon i qrupi bəyanat dərc kardəşe. Əvon elan kardəşone ki, "Haci Mevsum, Haci Abqul, Haci Taleh, Haci Zulfiğar, Haci Sərdar tənho nin, əvoni bə zindon dənoe -əməni həmey bə zindon dənoe bərobəre. Əmə həmə Hacı Mevsum, Haci Abqul, Haci Talehimon"

"Arannews.com"ən Hostoro şəhərədə bə Az.R dini məhbuson həmrayəti dair mərasim dəvunie həxədə xəbə doəşe. Hoccətulislam vəlmuslimin Mehdi Teymuri votəşe ki, əhali 80% şiə bıə məmləkətədə hicabi mudafiə kardə odəmon  bə zindon  dənoe, bə ağli munasib nıbə koe.