Boku Devlətə Universitetədə rışvəxorəti

Boku Devlətə Universitet sənibəton de rışvəxorəti mərəşulə əlağədar Respublika Mass-media nəzər cəlb kardəşe. Çəvrey rəhbəriyyəti, ilahiyyat fakultə tələbə Zəka Mirağayevış bə məhkəmə doə.

"Anaxəbər.az" ım hadisə səbəbi jiqo izah kardedə ki, Mirağayev çe dekani muavin Niqar İsmayılzadə rışvəxorə əməlon barədə bə H. Əliyev fondi prezidenti şikayət kardəşbe, hətto çəvrey səlahiyyətinə numayəndə ğəbulədən bıə. Əmo çimi nəticə nıbe səbəbiku bə vitse-prezident Mehriban Əliyeva, bə Daxili Koon Vəzarəti, bə Təhsil Vəzarəti təkrarən  de məktubi rəsmi muraciət vığandəşe. Isət çey anədə şikayəti nəticə əv bıə ki, ım tələbə ıştən de məhkəmə dimbədim mandənin bıə.

Soveti vaxtonədə çe Respublika lider universitet ısət deştə rışvəxorə rəhbəriyyəti xeyli məşhure. 2-3 sor çimi bə nav tələbon ım universiteti vədə bə rışvə etirazə aksiya dəvunuəşonbe. Bəvədən rektor Abel Məhərrəmovi oj-oşko rışvəxorəti mudafiə kardəşbe, çey bı barədə votə sıxanon hətto Yutubədən pevolo kardəşonbe. Əmo bı ali təhsilə muəssisədə rışvəxorə əməlon tosə ısət hələn dəvom kardedə.

"Korrupsiya.az" saytən Zənqilon rayoni hərbi komissar Eldəniz Suleymanli bə əsqəriəti dəvət bıə noxəşini hərbi mukəlləfiyyətiku azad karde ro çeyku 3000 mənot rışvə tələb kardəşe. Sayti muxbiri de ım məsələ əlağədar de həmonə vəzifədari telefonə əlağə oqətəşe. Eyən votəşe ki, bışənən bə "petonə" orqanon muraciət bıkənən.

Ğeyr-əz ım fakton həzo-həzo bımi oxşəş faktonən subutin ki, rışvəxorəti de "petonə" orqanon rəhbərəti icra bedə, ım qıley devlətə siyasəte. Respublika cəmiyyətədə bənə Zəka Mirağayevi lap kam odəm mandə ki, bə ım həğiğəti bovəş nıbo.