Az.R ədliyyə sistemədə ğəribə hadison

Az.R məmuron anədə bə ğeyri-ğanuniə hərəkəton ro dodən ki, həni şəhrıvandon bimi bənə adi qıley vəziyyəti diə kardedən. Hətto Martə manqi 16 Əvf sərəncomədə İlham Əliyevi bə umrinə zindonə cəzo məhkum bıə cinayətkari əvf kardeyən, bənə cey əsasən qonə cinayət kardəkəson əvfi cəmiyyətədə bə hiç qıley reaksiya səbəb nıbe. Yəni bə hokuməti jıqo ğeyri-ədalətinə hərəkəton əhali həni pemujiə, çeyku ğanuni qıley hərəkət həni hiç kəsən kardedəni.

Bı rujonədə məlum be ki, məhbus Mahmudov Elvin Bəxtiyari zoə ki, de Prezident İlham Əliyevi Marti 16 sərəncomi əvf bıənine,   azad kardəşon ni. İyo jıqo qıley fikir bə meydon beşe bəzne ki,  qaspu ey jı xəto kardəşe, bə qorə. Əmo ne, ey hiç qıley xətoşən kardəni. Əsas heyrətvardə əməl bımədəy ki, Ədliyyə Vəzarəti Penitensiar Xidməti də çey nomi co məhbus çe zindono azad kardəşe. Isət vote bəzneyon ki, ha çiç bıbo ki, ım xəto vadoə devlətə məmuron ıştə səhvi sərost bəkarden, həmonə odəmi obəqordonen bə zindon, Elvini azad bəkarden. Hejo ğəribə koən ıme ki, əvon tamam əks istiğamətədə hərəkət kardedən. Elvini moə bə "Azpolitika.info" sayti votəşe ki, çand kərə çe Ədliyyə vəzarəti, həmən Penitensiar Xidməti vəzifədaron ğəbulədə bıəm, əmo ımi hiç foydə bə nişe. Həmişə votəşone ki, ım qıley texniki səhv bıə, ey sərost bəkardemon. Əmo ısət məlum bedə, bə Elvini şər ğanedən ki, çey həbs muddəti ziyod bıkon". 

Çe Elvin Mahmudovi vəkil Adəm Məmmədoviən votəşe: "bə Prezidenti sərəncami hiç kəsi mudaxilə karde ixtiyar nişe. Çey icra məcburie.  Im sərəncami darıştə odəmon bə Prezidenti xəyanət kardedən və ıştə cəzo səninin".

Tosə ısət devləti  ğanuni darıştə məmuron becəzo mande cəmiyyətədə bə jıqo beğanuniə vəziyyət vardəşe bekardəşe. Hiç qıley umuən ni ki, prezident bəştə məmuron jıqo ıştənbəsə hərəkəton orəx doe ro əməli qıley tədbir bəvinde.