Az.R hokumət dini azadion məhdud kardəşe

Dəvardə sori Az. R-ədə bə dini azadion məhdudiyyət xeyli ziyod bıə. Hokuməti bə dini fəalon repressiya zümand kardəşe, bəzi məçiton dəbastəşe. AİŞ bə Dini Azadion Dair Beynəlxalqə Komissiya apreli 26-ədə ıştə pevolo kardə hesabatədə ımonış ğeyd kardə.

Bı hesabatədə votə bedə ki, Azərbaycani hokumət beynəlxalğə terrorə təhdidonədə bə dincə dini fəalon divon qəte ro bənə vonə istifadə kardəşe. Çəvonədə 86 nəfər bə zindon dənoəşe, bo 18 nəfəri 10 soriku tosə 20 sori zindonə cəzo bıriəşe. Çəvon məhkəmə ğeyri-obyektiv dəvardə, bəvon qonə işqəncə doe fakton bə oşko beşə. Devlət dini təşkilat və icmaon bə ğeyd sedəni, be ğeydiyyat fəaliyyət nişon doə qılon "ğeyri-ğanuni" hisob kardedə, bəvon təzyiğ nişon dodə, əvoni cərimə kardedə. Bə Dini Təşkilaton Dair Devlətə Komitə bə xeyli dini icma hələ 2009-minə sori bo ğeydiyyati ro kardə muraciəti tosə ısət cəvob doəş ni.   Bə im curə məhdudiyyəton qorə Komissiya Az.R dini azadion məhdud bıə devləton restə daxil kardəşe. Bı restə həmən Türkiyə, Bəhreyn, İndoneziya, Ğəzəxıstan, Malayziya və həniən co məmləkəton daxilin.

Komissiya iştə hesabatədə həmən bə Amerika hokuməti məsləhət zınəşe ki, vicdanə məhbuson azad karde ro de Az.R hokuməti sıft əlağə obasto, Amerika səfir de çıvrey siyasi və dini fəalon rabitə oqəto, Boku hokuməti dəvət bıko ki, bə İMT de bəşəri huğuğon vəziyyəti dair məruzəçion bə keşvər daxil bıe imkan bıdo və şərait bısoxto. Həmən bə "Radio azadi" və "Amerika sədo" radion Azərbaycanə şebə maliyyə təminati bə kam nıko.