Pars Today

Mayə manqi 1-minə ruji Haci Zülfiğar Mikayılzadə və çey 11 nəfər həmməsləkon məhkəmədə hakimi de məhbuson arədə qıley mərəşulə eqıniəbe. Çimi səbəbən əv bıe ki, ey de jurnaliston vey kobud, həmən sərt rəftor kardəşbe, əvonış çe məhkəmə zaliku tojniəbe.

Məhbuson bə hakimi jıqo hoziə hərəkəti etiraz kardəşonbe, bı səbəbən məhkəmə iclas nimədə mandəbe. "Vətənuğrunda.az" sayt nıvıştedə ki, həmonə ruji məhkəmə bəpeştə ım 12 nəfər məhbuson bə karser dənoəşone. 2-3 saati bədiqə çəvonədə 9 nəfər bə kamera oqordıniəşone, əmo Zülfiğar Mikayılzadə, Ramil Seyfullayev və Ruzi İsmayılov hələən karserədən. Im xəbə mayə manqi 4-minə ruji bə sayti məhbuson vəkilon Şəhla Humbətova, Akif Əliyev və  Rustəm Zulfiğarovi votəşone.

"Azadi radio" sayt xəbə dodə ki, Nardaranədə əlil Əbulfəz Bunyadovi kə polison tərəfo muhasirə vəziyyətədey. Bunyadov Nardarani hadisə vaxti de polisi qolulə bə zəxm qıniə. Bı səbəbən çey lınqon iflic vəziyyətədən. 13 manq zindonədə oqətə bəpeşt ponə sori dekabrədə məhkəmə əv de polisi nəzarətədə mande şərti bə kə vadoşe. Isət çey kəy vədə polisi daimi post onoəşe. Beiçazə hətto çey vəkiliən bəçı tono vadodənin. Əlavən vote lozime ki, 2015-minə sori noyabri 26-ədə polison bə Əbulfəz Bunyadovi kə  nomoji vaxti de silahi hucum kəşəşonbe. Çimi nəticədə 6 nəfər həlok, de Əbulfəzi bə i co 4 nəfərən zəxmin bıəbin.

"Arannews.com" bə Ğəfğazi Mədəniyyətə Mərkəzi istinadən təsdığ kardedə ki, hokuməti İslami hənəkon bəpeştə Haci Cavad məciti rıjnie ğəror hestışe. Az.R momin və ruhaniə odəmonən bə hokuməti islamofobiya, dini təzahuron məhv kardə, məçiton oçıniə hərəkəton muvağimət nişon doe barədə nəşnavi doəşone.