Hokumət bə Haci Zeynalabidin Təğiyevi irsi hurmət nodəni

Haci Zeynalabidin Təğiyev çe Azərbayçani xəlği sandinə tarixi şəxsiyyətonədey. De çey xeyriyyə və biznes fəaliyyəti əlağədar Bokuədə çand qılə tarixi bina və muəssison hestin ki, əvon ey ıştən doəşe inşa karde.

"Korrupsiya.az" bə "Hurriyyət" sayti əsasən xəbə dodə ki, Haci Zeynalabdini  Bokuədə 1897-minə sori Boftemonə Fabrik, 1898-minə sori qıley mərizxonə inşa kardəşe. Coveti vaxtonədən ım muəssison fəaliyyətədə bıən. Mustəğiləti iminə soronədə fabriki soədə bo Haci hətto heykələn noşone. Əmo peşonə soronədə fabrik muflis kardışone, çey heykəl de təmiri vonə oçınişone. Əmo mərizxonə tosə ısətən ko kardedə. Im 2 qılə tarixi bina, həmən çe fabriki 116 qılə ailə jimon kardə hıtəxonə xeyli muddət təmir nibe səbəbiku bə bərbod qıley vəziyyət eqıniə. Mərizxonədə munasib şəraiti, həmən təmiri nıbe səbəbe ki, ə vırə bə antisanitariya vəziyyət eqınə. Bi barədə məhəllə əhali de kollektiv imza bə Xətai Rayoni İcra Hakimiyyəti muraciət məktub vığandəşe. Sayti muxbiriən de ım problemi əlağədar bə həmonə adres muraciət kardəşe. İH Sosial şebə rəsmi məsləhətçi Rauf İbrahimovi votəşe ki, ım problem çəvon diğğətədey, lazımi tədbiron bəvinden.

Haci Zeynalabdini irsi muhafizə karde çe Azərbaycani devləti və çey hokuməti vəzifə dene. Dınyo miğyasədə bə xeyriyyə tədbiron, tarixi və dini abidon təmiri de milyonon pul xarc kardə hokuməti, nəinki Azərbaycanədə, həmən mısılmonə dınyoədə deştə xeyriyyə tədbiron məşhur bıə bənə H.Z.Təğiyevi qıley tarixi şəxsiyyəti irsi muhafizə nıkarde ocizanə qıley fakte.