Di təsərrüfatədə monopolist siyasəti nəticə
Kapitalizmədə iğtisadi inkişafi əsas stimul azad rəğabət, bo azad iğtisadi fəaliyyəti devləti tərəfo şərait və maliyyə imkanon soxteye. Isət Az.R devləti bardə monopolistə siyasət di təsərrüfatədən ıştəni oşko biruz dodə.
"İslamazəri.az" bə "Bizimyol.info" sayti istinadən çe Tovuz rayoni muəllimon bo təməku kaşte ro çe İcra Hakimiyyəti tərəfo səfərbər karde həxədə qıley məğalə dərc kardəşe. Çimnoz muəllimə votəşe ki, çey 62 sinn hestışe, çand vaxte ki, bı voşə rujonədə əvoni məçbur kardedən, çəkmə tan bıkon, bışon hiyonədə de təməku kaşte məşğul bıbon. Bə rozi nıbəkəson tars omedən ki, çe koyku bebəğanden. Hətto bəvon ğolən dodən kəşe, quya əvon "kenulli" yəni de ıştə mərami bə ım ko şedən.
Vəkil Cavad Cavadliən votəşe ki, budcə təşkilati koəkon ım curə bə ko səfərbər karde, bə ğanuni zidd qıley əməle. Respublika parlamenti hələ 2009-minə sori iyunə manqi 9-ədə " De ıştə mərami fəaliyyəti həxədə" ğanun ğəbul kardəşe. Rayoni İcra Hakimiyyəti im əməl bə həmonə ğanuni 4.3 və 4.4 maddon zidde, hokuməti rəsmi şəxson tərəfo devləti ğanuni oj-oşko dəmolə əməle, həmən Konstitusiya 35-minə maddə de hoziəti darışteye.
İlham Əliyev hokuməti de inzibati roy di təsərrufati inkişaf kardovnie nəticon bə ım sahə tənəzzuli, budcə pulon dızdie vardışe bekardışe. Təğribən 10 sor çimi bə nav "Pespublikadə çayəvonəti inkişafi ro devlətə proqrami" nəticə ıme ki, ısət məmləkətədə 1 sorədə cəmi 200 ton hışkə çay istehsal bedə. Vəhalinən bə çayi daxili tələbat sori 15 həzo tone. İğtisadşunas Vahid Məhərrəmov bə "Azadlıq.info" votəşe ki, orəxnə 10 sorədə bə reqionon sosial, həmən iğtisadi inkişafi devləti budcəku 50 milyard 700 milyon mənot pul xarc bıə. Əmo di təsərrufati tənəzzul kardışe və həmonə tənəzzul ısətən dəvom kardedə.
