AMEA -də səçın çokney dəvarde

Mayə manqi 2-minə ruji Azərbaycan Milliə Elmon Akademiya Rəyasət Heyəti Umumiə iclas dəvunişe. Bı tədbirədə bə Akademiya həğiğiə və muxbirə uzvon vıjnişone. Bənə nafkonə səçınon ım vıjniəyən de mərəşulə dəvarde.

"Aztoday.az" sayt de ım məsələ əlağədar çe Akademiya Fizika İnstituti həmkar, fizika-riyaziyyat elmon doktor Elman Şahverdiyevi bə İlham Əliyevi şikayətə məktub dərc kardəşe. Əv iddia kardedə ki, " ım hiçən səçın ne, çe Akademiya rəhbəriyyəti tərəfo təyinat bıe. Fizika sahədə Səlimə Mehdiyeva elmi nailiyyəton çımısə xeyli kam bıe, əmo  əvşon muxbir uzv vıjnie, çunki əv qıley klani odəme. Çimi qıleyən səbəb ım be bəzıne ki, şımə çey evlad bı nezonədə bə vəzifə təyin kardəyone. Bı səfən bə dı qılə  şəhrvandəti malik bıə odəm akademiya həğiği uzv vıjnişone ki, ımən bə devləti Konstitusiya ğanuni zidd qıley əməle. Isət akademikon miğdar 190 nəfəre ki, çəvonədə 10 nəfəri dıminə şəhrıvandəti hestışe".

Iştə ım muraciəti orəxədə Şahververdiyev Prezidentiku, bənə Konstitusiya qaranti akademiyadə ğaydə-ğanuni bərpo karde və əlavə səçıni dəvunie ro lazımi dəsturon doe xahiş kardedə.  Şahverdiyevi ım hərəkətədə ğəribə məğam bımədey ki, əv alim be -be ıştəni respublikadə mevcud vəziyyətiku bənə bexəbə odəmi bardedə. Məqər əv zınedəni ki, bı devləti hiç qıley vəsilədə hic vaxt səçın dəvardedəni, bə har səcıninə vəzifə  de Prezident Adminstrasiya dəstur və nəzarəti odəmon təyin bedən.

2014-minə sori  Akademiya səçınonən de jıqo noroziəti dəvarde. Bəvədən tarix elmon doktor Cəmil Həsənli de jıqo qıley muraciəti bə Respublika ictimaiyyəti Akademiyadə mevcud bıə toyfəbazəti, tərəfkeşəti, hərcı-mərcon barədə herı-hevuj məlumat doəşbe. Əmo çoko ki, həmonə muraciəti hiç qıley foydə nıdoşe, yəğin ki, Şahverdiyevi ım muraciətən  jəğo besəmər bəmande.