Boku hokuməti İmom Həzrət Mehdi (ə.c) mevludi ğeyd karde imkan nıdoşe.

Dəvardə həftə Bokuədə "IV umumdınyo Mədəniyyəton arədə Dialoqə Forum" dəvarde. 120 qılə məmləkəto 800 nəfər numayəndə bı tədbirədə iştirak hestışonbe. Prezident Əliyevi mərasimi obemonədə votemon kardışe. Azərbaycanədə dinon, konfession, xalqon arədə dinc və mehribanə əlağon həxədə de ğəvəpuri qəp jeşe, ımi bənə çey hokuməti bardə siyasəti bəhrə bə ğələm doşe.

Çey ım sıxanon peştono tamam co siyasəti niyo be Respublikadə həni bo hiç kəsi pınhon ni. "Nur az.com" sayt xəbə dodə ki, Azərbaycani İslamə Partiya 12-minə imom Həzrət Mehdi (ə.s) mevludi ğeyd kardə tədbir dəvunie piəşe, əmo Boku hokuməti bımi icazə doə nişe, çey vəş cə. Bo Ğərəboği ro İslami Muğavimətə Hərəkati sərdar Revşən Əhmədli, Ğərəboği Azadi Təşkilati sədr Akif Nəği, Puşinəfikron İbemoni sədr Eldəniz Ğuliyevi bə sayti muxbiri votəşone ki, İslamə Həmrayəti sorədə hokuməti bə Azərbaycani xalqi ıştə dini mənəvi tədbiron dəvunie imkan nıdoe, bə çəvon dini azadiə huğuğon ğəsd kardeye.

Mayə manqi 5-ədə Nardarani hadisə məhbuson məhkəmə dəvom kardəşe. Polison bə jurnaliston məhkəmə iclasədə iştirak karde imkan doəşon ni. Votəşone ki, ım  dəstur bəvon çe petono  doəşone ki, əvoni bə iclas vanıdon.  Həmonə ruji Hostoro polisi, rayoni Tanqəru və Vağo dion 5 qılə kədə axtarış dəvuniəşe, 365 qılə dini ədəbiyyat və 13 qılə disk musadirə kardəşe.