Bokuədə İslami Həmrayəti Hənəkon obemonə mərasim dəvarde
Mayə manqi 12-ədə Boku Olimpiya stadionədə IV İslami Həmrayəti hənəkon obemonə mərasim dəvarde. İm hənəkon 11 ruj - mayi 12-ku tosə 22 dəvom bəkarde. "Apasport.az" sayt məlumat dodə ki, 57 qılə mısılmonə devlətonədə 54 devləti 3 həzo nəfərisən vey vərzeşkar 21 vərzeşə nevədə bə bəhs bebəşen, bo 269 dast medali ro mubarizə bəbarden. Kuveyt, Sudan və Liviya komandon bı hənəkonədə iştirak nibəkarden.
Bə ım Hənəkon həməysə vey miğdarinə komanda Turkiyə bəvarde- 345 vərzeşkar. Az.R komanda de 335 , İroni İslamə Respublika de 300 nəfər atleti bə musabiğat umjən bəqınen .
Prezident İlham Əliyevi Hənəkon ərəfədə sərəncom doəşe ki, Az.R 1-minə, 2-minə və 3-minə vırə qətə vərzeşkaron de ım tərtibi 100 həzo, 50 həzo və 30 həzo mənot, bə çəvon məşğçionən 50 həzo, 25 həzo və 15 həzo mənot mukafat bədon.
Az.R Milli Olimpiya Komitən çimi muğabilədə bo ıştə medal sə vərzeşkaron və bo çəvon məşğçion pulinə mukafat nəzərədə qətəşe. Çey məbləğ Prezidenti mukafatisə təğribən 2 kərə kam bəbe.
Muxalifət Az.R komanda niməsən vey xaricməzhəb vərzeşkaronədə ibarət be votedə, bımi bənə hokuməti məmləkəti daxilədə vərzeş siyasəti iflasi ğıymət dodə.
