Az.R Beynəlxalqə Banki ıştənış muflis elan karde
Məşhur "Forbes" mahnamə çe Az.R ən yolə Beynəlxalqə Banki ıştə xarici ğarzon oqordınie nızıne barədə nıvıştəşe. Respublika KİV çe devləti nəzarətədə bıe səbəbiku ım xəbə hokuməti rəsmi informasiya mənbon ne, "Azadlıq.info" sayti pevolo kardəşe. Mahnamə bə banki muflis elan karde fakti bənə "Azərbaycani iflasi" ğıymət doəşe.
Məlum bıə ki, Beynəlxalqə Bank mayə manqi 11-ədə ıştə 3,3 milyard dollar ğarzi restruktizasiya karde ro bə Nyu-Yorki məhkəmə muraciət kardəşe ki, ey muflis elan bıko. Martə manqədə ım banki bəştə yolə kreditori - bə Cargill Financial Services International muəssisə 715 milyon dollar krediti avjor karde imkanış bıə ni. Mayə manqi 12-ədə Nyu-Yorki məhkəmə BB -i muraciət bə icra peqətəşe, çey aktivon xarici kreditoron iddia tələbonku mudafiə kardə ğərar doəşe. Im ğərar de tosə məhkəmə iclasi bekardə hokumi ğıvvədə bəbe. Məhkəmə bə iyunə manqi 7-minə ruj təyin bıə.
“Global Risk Insights” ğeyd kardedə ki, ım hərəkət bo Azərbaycani maliyyə vəziyyəti qley fəlakətə işarəy. Banki səhmon 80% çe hokuməti dastədə bıe, ım banki de məmləkəti ən dıjdə şirkəti - de SOKAR- i sıftinə əlağon be səbəbiku ey muflis elan karde məmləkəti iştisadiyyati vey nığılə behranədə bıe nişon dodə.
İğtisadşunas eksperton fikir jıqoe ki, Beynəlxalqə Banki muflis bıe bə SOKAR -i maliyyə vəziyyətiən zərbə jedə və bo çeyən muflis bıe şərait bə əməl vardedə.
