Tacikistonədə bo dini məktəbon soxtero Ərəbıston 35 milyon dollar sərmoyə nodə.

Tacikistoni iğtisod vəzarətxanə de Ərəbıston qıləy mığovilə basteku xəbəş doə ki bə çəy əsos Ərəbıstoni inkişof fond ğərore ki Tacikistonədə çandə dini məktəbon bısoxti.

Bə İrna raporti əsos ım ğərordod tojədən Cəddədə ijən Tacikistoni iğtisod vəzir Əbdul islam Ğorbaniyan və Ərəbistoni inkişof fondi rəis Yusef Ebrahim Əlbəsami miyono imzo bəy.

Ərəbistoni Ali səud rejimi hakimon islamiyə kişvəronədə bo Vəhabiyət zallə firğə rəvoc doe xoto çand sore ki jıqo məçit və məktəbon soxte siyasi binoşon kardə ijən bo ıştə nıfuzi ziyod kardero vey pulon xərc kardedən.

Bənə nımunə Pakistonədə bə 20 həzo nızi məzhəbiyə mədrəsəon hestin ki veyni çəvonku çı Səudi Vəhabion tərəfiku idarə bıdə.

Im məktəbonku fariğo təhsilonku veyni oxoy sə bənə Ləşkər Cəhənqvey və Sepah Səhabə nomo bıə terroristi və radikaliyə qruponədə uzv bıdən.

Tojədən Ali Səud rejim, Əfğanestanədə həm bo Vəhabiyət Zallə fırğə rəvoc doero vey hərəkəton iyən fəaliyəton binoşon kardə ki çın kişvəri alimon həminə siyasəti nəticəon barədə bə Əfğanestani millət xəbədoəti doəşone ijən ıştə niqəranətişon jıqo zallə fırğəonku elanışon kardə.