Boku hokumət tarixi abidon çokney mudafiə kardedə

İlham Əliyevi hokuməti dınyo muxtəlif keşvəronədə tarixi abidon, kilsəon, məbədon, sarayon təmir, məktəbon, mərizxonon inşa karde, muxtəlif xeyriyyə tədbiron dəvunie bə ictimaiyyəti çok məlume. Bo beynəlxalqə vərzeşə musabiğaton dəvunie, xarici vərzeşkaron bə milli komanda cəlb karde ro çanədə budcə vəsaiti xarc beyən həməkəson zınedən.

Jıqo məğamədə Respublika daxilədə çanədə tarixi abidon, məktəbon, kitobxonon bərbad vəziyyətədən, bə təmiri ehtiyac hestışone. Bı barədə "Azadlıq.info" sayti qıley məğalə nıvıştəşe. Məğalə muəllif ğeyd kardedə ki, Mədəniyyət Vəzarəti etiraf kardəşe ki, "Respublikadə 6308 qılə tarixi abidon yolə əksəriyyət bərbad vəziyyətəde, bə çəvon təmiri ro vəsait rəsedəni". Bəs çoko bedə ki, hokumət Romadə Kapitoli muzeyi, Vatikani Katakombon, Fransadə "Çəmə ledi" kilsə, Luvr, San-Jermen muzeyon, Versal sarayi, Notrdam, Sant Patern kilson təmir karde, Budapeştədə əğılə bağçə, ibtidai məktəb, Bosniyadə tibbi mərkəz inşa ro pul peydo kardedə, əmo Xaçımaz rayonədə qıley miyonə əsron Alban məbədi təmiri  ro vəsait peydo karde zınedəni?

"Tarixi -mədəni və təbii irsi muhafizə" Ğeyri-hokumət Təşkilati sərdar Aytəkin İmranova bə muəllifi votəşe ki, Respublikadə tarixi abidon veyni rıjie təhlukə vədən. Ponə sori çe Prezidenti fondiku 20 milyon mənot pul bə dini və mədəniyyət abidon təmiri xarc kardəşone. Hokumət har sor devləti pulon de ım məğsədi xarc be elan kardedə, əmo kom dini və ya tarixi abidə təmir be bə hiç kəsi məlum bedəni.