İroni Milli Banki Boku şəhəri İcra Hakimiyyət bə məhkəmə doəşe

Boku şəhəri İcra hakimiyyəti sərdar de Hacıbala Abutalışovi dəsturi bə "İroni Milliə Banki" məxsus bıə bina oçıniəşone. "İslamazəri.com" bə APA istinadən xəbə dodə ki, ım bina ğıymət təğribən 9 milyon 300 həzo mənot molyətədə bıə. Əmo Boku hokuməti bə banki həmonə məbləğədə kompensasiya doəş ni. "Azadi radio" sayt nıvıştedə ki, Boku 1 numrəninə İnzibati-İğtisadi Məhkəmədə bə Banki iddia diə kardedən. Boku İH rəsmiyon bı barədə bə ım Radio parsi cəvob doəşon ni.

Im curə ğeyri-ğanuniə, beədalətinə əməlon Az.R hokuməti məmuron tərəfo çand sorone ki, dəvom kardedə. Bı nezonədə "Korrupsiya.az" sayti "Rifah plaza" inşaat şirkəti Suleyman Rustəm kuçədə qıley bina oçınie, bə çey sakinon kompensasiya nıdoe barədə nıvıştışe.

"Qaynar.info"ən xəbə dodə ki, Sumğayit şəhərədə 66 nəfər taciri dukonon oçınidən. Məhkəmə ğərar bekardəşe ki, hokumət bəvon kompensasiya doənine. Əmo şəhəri İcra hakimiyyət bımi məhəl nodəni, taciron məcbur kardedə ki, ıştə dukonon teykon,  əraziən  tərk bıkon. 

"Azadlıq.info" sayt "Dağlar" Mənzil İnşaat Kombinati 30 nəfər şəhrıvandi bə dast dənoe barədə nıvıştəşe ki, çəvon pulon səşone, əmo bəvon mənzil doəşon ni. Yəni de dələdızdiəti roy çəvon pulon dələmurd kardəşone.

Az.R  ictimai jimonədə real vəziyyət ısət ım curey. Hokuməti məmuron bə hiç qıley ğanuni əməl kardedənin, har qəmədə de şəhrvandon huğuğon darışte məşğulin.