Ərəbiə səyyodon Az.R -ədə çokney şikar kardedən

Orəxnə soronədə Boku hokuməti de Xəlice-Fars hevzə ərəbiə şeyxon dustiəti əlağon sıft karde nəticədə çe ım məmləkətonku bə Az.R omə turiston miğdar xeyli vey bıə. Çəvon arədə bə şikari meyil nişon doə odəmonən kam nin. "Azadlıq.info" de ım mevzu əlağədar nıvıştedə ki, ərəbiə səyyadon əsasən "Sıə kitob"ədə bıə pərəndon və heyvonon şikar karde vey marağ nişon dodən. Çəvon de səxavəti pul xarc kardeən devləti məmuron bə çəvon Respublika daxili ğanunon darışte pape nıbe səbəb bedə.

Bo əvon robələdəti kardə odəmon votedən ki, şikar karde ro lisenziya ğıymət 800 dollare, əmo ım boəvon boho bə sə omedə. Çunki, ğanunədə bo şikari xeyli məhdudiyyəton hestin. Bə mıv, bət, həvuşi şikari məhdud miğdarədə uçazə dodən. De avtomobili, və ya 3 nəfərisən vey odəmi bə ico şikar karde icazə ni. Əmo ərəbiə səyyadon bımi məhəl nodənin, nəzarətçion rışvə muğabilədə bə çəvon ıştənbəsə hərəkəton pape bedənin.

Robələdon ımiən votedən ki, ərəbiə şikarçion bə dığdığ nominə pərəndə ki, nomış "Sıə kitob"əde, vey şikar karde həvəs nişon dodən. Çunki, ım pərəndə bo çəvon de ıştə vardə bənə boşək, ğəcı tisbirədə qujdhardə pərəndon zımhore.

Im odəmon de silahi təchizati məsələn de ğanuni darışte roy həll bedə. Rayoni məmuron ıştə həmdivojonku tifanqi bə icarə peqətedən pul avjor karde muğabilədə bə səyyadon dodən ki, ım əmələn bə Respublika muvafiğ ğanuni zidde.

Sosial şəbəkonədə ərəbiə şikarçion jıqo ğeyri-ğanuniə hərəkəton bə etirazi səbəb bıə. Ekoloqiya və Təbii Sərvəton Vəzarətiən bə jıqo etirazon cəvobədə votəşe ki, ımsornə şikarə mevsumədə 16 nəfər ərəbiə səyyad şikari ğanunon darışte səbəbiku cərimə, və de Vəzarəti təğdimati çe məmləkəto deportasiya kardəşone.