Boku hokuməti bə dini fəaliyyəti əlavə məhdidiyyəton tətbiğ kardışe

De Rujə manqi bino be əlağədar Ğəfğaz Mısılmonon İdarədə qıley iclas dəvuniəşone. Bı tədbirədə de Dini Təşkilaton Əlağədar Devlətə Komitə sədr Mubariz Ğorbanli elan kardəşe ki, "kəonədə bo Ğıron omute ro kurson təşkil karde ğeyri-ğanunie. Hətto Ğıroni tədris karde səlahiyyətədə bıə dini xadimonən ım koy bəpe məçitonədə təşkil bıkon. Məçitiku bə kəno jıqo dərson təşkil karde əmə ro nibədomon".

Şeyxulislam Allahşukur Pasazadən bəzi məhdudiyyəton izah kardəşe ki, axund və imomon ıştə moizonədə məzhəbi nomon, şiə və sınni arədə fərğon barədə qəp je ğeyri-məğbule. Ey həmən bə dini xadimon Rəməzonə manqədə iftoriku bə navonə məclison təşkil və bə tədbironədə iştirak kardeyən ğədəğən kardəşe. Votəşe ki, jıqo vəziyyəton bə əməl məvənən ki, az həmonə odəmon çe koyku bekarde barədə ğəror doe məcburiyyətədə bımandım". İm xəbə "İslamazəri.com" sayti bə APA istinadən pevolo kardəşe.

"Nur.az.com"ən AİP sədr doktor Mevsum Səmədovi sənibəton bə Sərpuşə Həbsxonə vığande cəhdi barədə çey vəkil Yalçın İmanovi sıxanon dərc kardəşe. Ey votəşe ki, zindoni mudiriyyəti bə Mevsum Səmədovi jimoni quya diqər məhbuson tərəfo təhdidon be səbəbiku bə məhkəmə muraciət kardəşe ki, ey bə  Sərpuşə Həbsxonə oqordınie barədə ğəror bıdo. Əmo çey muraciəti əsil səbəb ıme ki, doktor Səmədovi məhbuson arədə yolə hurmət hestışe, dəvon ilahi və əxlaqi mevzuədə sehbəton bardedə, ımiən zindoni rəisış bə təşviş eğandə.

Huğuğ mudafiəçion Rəsul Cəfərov, Ğorban Məmmədov, Namizəd Səfərovi bə "İslamın sesi" sayti de ım məsələ əlağədar votəşone ki, hokumət bə  xətomandə siyasəti mubaşir bıə və xarici ğıvvon dastədə bə boziçə peqardedə.