Az.R muəssison de ziyani ko kardedən

Azərbaycani Beynəlxalqə Banki ıştəni muflis elan karde Respublika iğtisadiyyatədə hiçən təsadufi hadisə ni. Behranə vəziyyəti devləti diqər muəssisə və orqanonədən dəvom hestışe. "Azadlıq.info" xəbə dodə ki, Devlətə Kemruqə Komitə aprelə manqədə bə budcə ponə sori apreli nisbətən 40 milyon mənot, və ya 18% kam verqi avjor kardəşe.

Hisobkardə Palatan elan kardəşe ki, 2016-minə sori devlət ıştə daxili və xarici ğarzon icra karde ro bə navonə, yəni 2015-minə sori nisbətən 2,5 kərə, 2014-minə sori nisbətədə isə 4,7 kərə vey pul xarc kardəşe.

Az.R iğtisadi vəziyyəti "Azərişıq" Ojə Səhmdar Cəmiyyəti maliyyə vəziyyətədə çok vində bedə. Bo ım Muəssisə de ziyani ko karde ro hiç qıley səbəb mevcud ni. Əv bə əhali bərği çe rəsmi məzənnəsən boho həvatedə. Məsələ bımədey ki, kəonədə elektrikı hisobkardə cihazon "Azərişıq"i laboratoriyadə məcburi ğaydədə jıqo tənzim kardedən ki, əv elektriki umumi normonsə ziyod hisob kardedə. De ım hisobi, ım muəssisə hiç çur de ziyani ko karde əzıni. Əmo çey  dəvardə sori ziyan 25 milyon 600 həzo mənot təşkil kardəşe. 2015-minə soriən ey de 31 milyon mənot ziyani bə sə jəşbe.

Bənə "Azərişıq"i  bə xiridarinə sərvəti malik qıley muəssisə de ziyani ko karde səbəbi hokuməti tərəfo tədğiğ nıkarde, həmən Beynəlxalğə Banki bə muflis vəziyyət ome səbəbon çe ictimaiyyatiku niyo karde,  jıqo qımon bə əməl vardedə ki, hokuməti tərkibədə qıley kriminal struktur mevcude, əv de devləti vəsaiton dələmurd karde məşğule. Jıqo halətədə iğtisadiyyati çe behraniku nəinki bekarde mumkun nibəbe, əksinə çey tamam bə bankrot vəziyyət eqınie labud bənine.