Taleh Bağırzadə fərzəndi nom boçi ğədəğən kadrəşone

2016-minə sori iyuli 25-ədə Nardarani hadisə məhbus Hacı Taleh Bağırzadə qıley zoə fərzənd bə dınyo ome. Valideynon bey Əbulfəzlabbas nom noşone. Əmo Yasamal rayoni Ğeydiyyatə Şebə bə əğıli de ım nomi şəhadətnamə doe imtina kardışe, votışe ki, Azərbaycani Elmon Akademiya Ədəbiyyat İnstituti ğəbul kardə nomon siyahiədə Əbulfəzlabbasi nom nıbe səbəbiku bə əğılon ım nomi noe ğədəğəne.

Hacı Tale jimonı həmro Leyla İsmayılzadə bə məhkəmə muraciət kardışe. Boku 1 numrəninə İnzibati Məhkəmə 3 manqi dırozi im ko tədğiğ, və nəhayət imsornə marti 27-ədə çe Ğeydiyyat Şebə hərəkət bəqəm, çe Leyla xanımi şikayət isə rədd kardışe. Im ğərari surət sərasər 2 manqi bədiqə may 24 -ədə bey vığandışe.

Vəkil Yalçin İmanovi məhkəmə ım ğərar bə Az.R Konstitusiya, Avropa Konvensiya və Respublika Ailə məcəllə zidd hisob kardışe və bə Apellyasiya məhkəmə şikayət vığandışe.

Soveti vaxtonədə bəzi odəmon bə ıştə əğılon Traktor, Kombayn,  Aqronom, Anqina nom ənen. Jıqo halon vəy se ro hokuməti icazə doəninə nomon siyahi muəyyən kardışe. Əmo dini nomon ğədəğən nıkardışe. Bexıdoə Şura hokuməti bə dini nomon ğədəğə noəş nıbe. İlham Əliyev isə i tərəfədə Həcci ziyarət kardedə, İslamə həmrayəti şuari bə nav dodə, diqər tərəfədə bə ıştə xalqi dini mənəviyyati zərbon jedə, bəvon ğədəğon nodə.