Bə dınyo milləton quş həğiğət peyğomi rosniyero çı İmom Xomeyni(r) bəlağət.

Azərbaycan Respublikaədə İroni Yolə Rəhbəri nımoyəndə votışe: İroni islamiyə inğilabi təsisəkə Həzrəte İmom Xomeyni(r) karde zındəş be dınyo cəmaəti deştə hədəfon oşno bıkə və ıştə sıxəni de bəlağət və fəsahət bə çəvon quş bırosni.

Bə İrna raporti əsos Azərbaycan Respublikadə İroni Yolə Rəhbəri nımoyəndə Huccətul İslam Seyed Əli Əkbər Ocağnijad Bukoədə bıə İroni səfarətxonədə bo Mərhum İmom Xomeyni(r) bəfot karde 28 minə sorqardeşiro bərpo bıə mərasimədə əlovəş kardə: detosə bə ısət vey alimon və dınyo məşhurə şəxsiyəton çı İmom Xomeyni(r) yolə şəxsi barədə kitob nıvıştəşone.

Ocağnejad çı İroni inğilabi təsis əkə jimon və fəaliyətonış bə Xıdo imon varde əsos və bə hədəf iyən millət xatircəm mande xoto zınəş be və təsdiğış kardə: İroni millət həm sadiğanə və deştə Lideri əhd baste xoto ıştə coniku İmom Xomeyni(r) hədəfon əməli karderoədə səy və cəhd iyən fidokarətişon kardə.

Bukoədə İroni səfarətxonə mədəniyə məsul həm ım mərasimədə İronədə prezidentəti tojə səçıni çı islamiyə demokratiya oşkorə nımunə və simvol hisobış kardə və əvış çı İroni nizom və İmom Xomeyni(r) hidoyəton bərəkət zınəş be.

Maştə İronədə Xordadə manqi 14 və de İroni islamiyə nizomi təsisəkə Həzrəte İmom Xomeyni(r) bəfot karde 28 minə sorqardışe.