Almaniyadə banan çe Az.R -sə erjone

Az.R-ədə iğtisadiyyati həmə sahon monopoliston inhisarədə be həni bo hiç kəsi pınhon ni. Tosə ısət respublika iğtisadiyyati çe behraniku beşe nızıne, behrani rujbəruj həniən nığıl bıe əsas səbəbonədə qıleyən ım fakte.

"Azadlıq.info" sayt nıvıştedə ki, məmləkəti daxili vıjorədə banani məzənnə xarici ticarəti idxal sahə çanədə çe monopoliston dastədə bıe oşko numayiş kardedə. Isət AİŞ-ədə banani 1 kilo de mənoti hisobi bə 2 mənot 21 kopik, Almaniyadə 2 mənot 47 kopik, Azərbaycanədə isə bə 3 mənot 50 kopike.

İm sori sıftənə 3 manqədə bə məmləkət çe Ekvadoriku 7 həzo 130 ton banan vardəşone. Kemruqədə çey ğıymət 77 sent, yəni 1 mənot 30 kopik bəyon kardə bıə. Haliyədə bə respublika banani, həmən sitrus mivon i qılə şirkət - «Asadov Capital Azərbaycan» Məhdudə Məsuliyyətinə Cəmiyyət idxal kardedə. Çey soyb Rafiğ Əsədov nomədə qıley şəxse.

Azad İstehlakçion İbemoni sədr Eyyub Huseynovi bə Azadi radio  votəşe ki, Azərbaycanədə banani ğıyməti ım ğədər boho be səbəb bımədey ki, bə keşvər de banani idxali i qılə şirkət məşğul bedə, çey ticarəti ım sahə səpe inhisar, bə ım məhsuli ğıyməti jıqo boho bıe səbəb bedə.

Im monopolist şirkət bə muxbiron parsi hiç qıley cəvobış doəni.

Ponə sori Parlamentədə iğtisadşunas - deputat Vahid Əhmədovi monopolizmi vəy se ro ğanun ğəbil karde zəruri be ğeyd kardışe. Çey həmkar akademik Ziyad Səmədzadən bey jıqo qıley cəvob doşe ki, ım məsələ Prezident Adminstrasiya diğğətəde, əyo munasib ğəror ğəbul kardə bəpeşt MM-ən bey muvafiğ  hərəkət bəkarde. Isət yəğin bedə ki, ım məsələ həni nə çe PA, nəən çe MM - i diğğətədə ni.