Boku hokumət çı cur bə əğılon tənəvəc mandedə

İyunə manqi 1-minə ruj Əğılon Beynəlxalqə Mudafiə ruje. Demi əlağədar Lankoni İcra Hakimiyyəti şəhəri mədəniyyətə mərkəzədə qıley tədbir dəvunişe, konsert doşe, çe H.Əliyevi və İ. Əliyevi de əğlıon vindemonon həxədə video klipon numayiş kardışe.

"Aztoday.az" sayt nıvıştedə ki, ım cürə tədbiron respublika co vıronədən dəvuniəşone. Bı tədbiron dəvunie ro çanədə budcə vəsaiton məsrəf karde barədə qəp je ehtiyac ni. Çunki, Az.R məmuron bə jıqo tədbiron bənə ıştə sərvəti ziyod kardə mənbə diə karde bə həməkəsi çok məlume.

Respublika hokuməti  əğılon sosial mudafiə kardeədə çe dınyo diqər devlətonsə xeyli bə dumo mandedə. Həmonə sayti çe ığtisadşunas - ekspert Natiğ Cəfərli bı barədə bə "Qaynarinfo" sayti votəyon dərc kardəşe. Ey votəşe ki, əğıli bə dınyo ome ro Boku hokuməti doə muavinəti məbləğ cəmi 95 mənote. Vəhalinən bə fermeri i qılə cinsə pəsi vəçə perosnie ro 100 mənot subsidiya dodə. İmən hokuməti çanədə bə əğılon himayə mande nişon dodə.

Həmən məlume ki, səhiyyə muəssisədə əğıli bə dınyo ome bo valideynon bə 600-700 mənot bə sə omedə. Dınyo co məmləkətonədə əğılon sosial sığorta tosə çəvon 16 sınni devlət bəştə ehdə peqətedə. Az.R hokumət isə əğılon jıqo sosial mudafiə, həmən bə çəvon moəon  hiç qıley qozəşt və muavinət nəzərədə qətedəni.

Har sorədə 1 ruj - iyuni 1-ədə bə əğılon şərəf konsert doe, raxs karde bə çəvon mudafiə hic qıley foydə vardedəni.