Hokuməti Sumğayitədə hırdənon zəhərəlud be səbəb bə oşko benıkardışe

Sumğayit şəhəri və çey ətrof Masazır, Corat, Haci Zeynalabidin Təğiyev, Ceyranbatan, Saray ğəsəbonku iyuni 9-ədə 119 nəfər hırdən de zəhərlud bıe səbəbi bə mərizxonə vardəşone. Çəvon 72 nəfər Təğiyev ğəsəbə sakinin. Im hırdənon və çəvon valideynon çimi səbəbi krani kolə ovi peşomeədə vindedən.

"Aztuday.az" sayt valideynonədə Əkbər İsmayılov, Altay Əsgərov, hırdənonədə İlğar Mevsumov, Nəzrin Nəzərova votəyon misal vardedə ki, ım epidemiya səbəb ovi tərkibi notəmiz beyədey. Im xəbə sosial şəbəkonədə bə panika səbəb be. Hətto həmonə hırdənonədə 12 nəfəri tələf be həxədə nıvıştəkəsən bıe. Sumğayiti Əğılə Mərizxonə sər doktor Muşfiğ Məmmədli bə "Lenta.az" sayti votışe ki, hırdənon əksəriyyəti səhhət bə norma eqınie qorə vadoəmone bə kə. Əmandəyon daimi tibbi nəzarəti jitonon, bo norohət be əsas ni. Səhiyyə Vəzarəti həmkaronən ım məsələ nəzarətədə oqətedən. Vəzarəti mətbuat katib Liya Bayramova votəşe ki, laboratoriya nəticon vəomə həftədə elan bəkarden. Bə sosial şəbəkə şaiyon bovə karde lozim ni. Bə mərizxonon çand sa muraciəton barədə xəbonən səhvin.

De ım hadisə əlağədar "Azərsu" Ojə Səhmdar Cəmiyyəti həmkaron həmonə ruji bı məntəğonədə krani ovi numunon peqətəşone bardəşone bə laboratoriya. İyuni 10-də laboratoriya analizon nəticə elan kardışone ki, ovi tərkib bə standarton tam muvafiğe. Im epidemiya ovi tərkibiku bə meydon omə ni.

Bo əhali səhhəti jıqo qıley xətokar hərəkəti hokuməti xususi xidmət və huğuğ muhafizə orqanon ım ğədər biqonə munasibət həni şəhrıvandon arədə təəccub bə əməl vardedəni. Devləti həmə vəsilə məmuron ıştə vəzifə deni icra nıkarde ısət bə adi qıley vəziyyət peqardə.