Sumğayıtədə hırdənon zəhərəlud be səbəb məlum bıe

Sumğayıt və çey ətrof ğəsəbonədə hırdənon kutləvi zəhərəlud be səbəb nəhayət ki, bə oşko beşe. Hokuməti rəsmiyon 3 ruji muddətədə de muxtəlif vonəon ım hadisə əsil səbəbi çe içtimaiyyətiku niyo oğəte cəhd kardışone. İyuni 12-ədə "Azadlıq.info" sayti xəbə doşe ki, çe "Azərsu" Ojə Səhmdar Cəmiyyəti həmkari bə Meydan TV çey nomi de anonim oqəte şərti votəşe ki, ımsor de budcədə pul nıbe vonə çe xarico ovi dezinfeksiya karde ro xlorə tərkibinə dəvocat nısənışone.

"Ceyranbatan"i anbo ovi har sor de ım dəvo təmiz kardedəbin. İmsor nıkardışone. Isət həvo tasbe səbəbiku ovədə mikrobon fəal bıən. Əğılon orqanizmi muğaviməti zəifəti bə çəvon noxəş qınie səbəb bıə. Həmonə şəxsi əlavə kardəşe  ki, ımsor fevrali 24-ədə İlham Əliyevi bo əhali de peşomə ovi təminati ro 16 milyon mənot pul co kardışe. İyuni 5-ədən rayonon əhali de ovi təminati çok karde məğsədi əlavə 10 milyoni 500 həzo mənot vəsait co kardəşone. Anədə devlətə budcə vəsaiton bə kom vırə məsrəf be barədə bə cəmiyyəti hiç qıley məlumat dodənin. 

Səhiyyə Vəzarəti Qiqiyena və Epidemoloqiya Mərkəzi məlumat doəşe ki, hırdənon zəhərəlud be səbəb "rotavirus" infeksiyay ki, əvən iqlə de ovi peşoməy bə orqanism daxil bedə.

Jıqo vəziyyətədə Boku hokuməti vey ğəribə mevğe numayiş kardışe. Ey bə "Azərsu" muəssisə rəhbəriyyəti ım cinayət tərkibinə əməli reaksiya doe əvəzi, Daxili Koon Vəzarəti Mətbuat Xidməti de ictimaiyyəti əlağə şebə rəis İlham Babayevi bə "Modern.az" sayti votəşe ki, hırdənon bə mərizxonə eqınie xəbə de "WhatsApp"i vasitə  əhali arədə pevolo kardə odəmi şəxsiyyəti muəyyən kardə bəpeşt, ey de kom məğsədi bə ım hərəkəti rəvoc doe barədə təhğiğat bino bəkarden.