Az.R -ədə intihari miğdar sorbəsor vey bedə

Az.R -ədə əhali quzərani rujbəruj qıvonin be bə intihar hadison miğdari ziyod be səbəb bedə. Əqər 2008-minə sori Respublikadə 138 nəfəri bəştə ğəsd kardəşbebu, 2016-minə sori im nəticə təğribən 6 kərə ziyod bıə, bə 797-i rəsə.

Ekspert Natiğ Cəfərli çimi səbəbi əsasən kreditə ğarzi oqırdınie imkani nıbeədə vindedə. Ey bə "Sherg" sayti votəşe ki, hokuməti çe Azərbaycani Beynəlxalqə Banki 10 milyard mənot kredit təmiz kardışe. Əmo bə 2 milyon odəmi çəvon krediton hiç nıbo de  peqətə vaxti məzənnə oqırdınie barədə qozəşt nıkardışe. İmən əhali krediti bəzən 3 ğat məbləğədə oqırdınie məcbiriyyətədə oqətedə.

"Nuraz.com" sayt Məştəğə ğəsəbə sakini bəştə ğəsd karde barədə nıvıştışe. 50 sınninə Lutfəli Cabbarov xeyli vaxt be ki, bekorə bıe. Hiç vırədə ko peydo karde zınedənıbe. Bə ərzağə dukonon 600 mənot ğarzi oqırdınie imkani nıbe səbəbiku ıştə dasti damari de asə bırie roy bəştə jimoni orəx doəşe.

"Azadlıq.info" saytən çe MƏV -ku zərərdidə 2 nəfər şəhrıvandi bə intihari cəhd kardeku xəbə doşe. Im 2nəfər - Sahib Ğurbanov və Zaur Əzimov MƏV zabiton məhkəmədə şohidəti ifadən doəşone ki, bə vaxtonədə ım Vəzarətədə çəvonku de zuy 370 həzo dollar pul səşone. Isət ım zərərdidə şəxson de həmonə pulon bəvon oqırdınie xahişi çe prezidentikuş qətə ta bə Sər prokurori muraciət kardəşone. Əmo bəvon nəinki həmonə məbləğı oqırdınidənin, hətto əvoni şantaj kardedən ki, əqər ıştə tələbiku dast nıkəşon bəçəvon əleyh cinayətə ko bino bəkarden və əvoni dəbənon bə zindon.

Jıqo beədalətinə cəmiyyətədə intiharə hadison miğdari ziyod be tam labud qıley haləte.