Az.R əhali məmləkəti boçi tərk kardedə

ÇeTurkiyə Respublika Miqrasiya xidməti 2016-minə sori bə məmləkət omə muhaciron statistika elan kardəşe. Əyo bə Az.R dair rəğəmon çe Boku hokuməti daxili siyasəti çe əhali quzərani bə kom vəziyyət dənoe oşko kardedə.

Məlum bıə ki, ponə sori 40 həzo nəfər azərbaycanıj bə Turkiyə bə muhacirət şə. Çəvonədə 7 həzo 300 nəfəri əyo bo daimi mande ro bə Miqrasiya xidməti muraciət kardəşe. Turkiyədə daimi mande ro icazə sə əcnəbion umumi miğdar 423 həzoe ki, çəvonədə 39 həzo 200 nəfər azərbaycanıjə muhacironin. De ım miğdari əvon diqər məmləkəto omə muhaciron arədə 3-minə vırə qətedən. 1-minə vırədə de 56 həzo nəfəri irağıjon, 2-minə vırədə de 49 həzo nəfəri suriyavıjon mandedən. Məlume ki, İrağ və Suriyadə de imperialist ğıvvon təhriki  şəhrıvahdon arədə canq şedə, çanədə əhali bə dınyo məmləkəton paran-paran bıən. Turkiyədə çəvon miğdarı bə co keşvəron nisbətədə vey be labud qıley hole. Əmo çe Az.R -ku anədə şəhrıvandon muhacirət karde de Boku hokuməti əhali firəvanəti barədə votə  tarifinə qəpon muvafiğ omedəni.

"Azinform.az" saytən Respublikadə izdivaci vəziyyəti həxədə nıvıştedə ki, ım sornə yanvarə manqi əvvəliku tosə  aprelə manqi axıri 18 həzo 229 qılə tojə ailə, jəni izdivac bə ğeyd sə bıə, 4 həzo  896 qılə ailə izdivac ləğv kardə bıə, yəni har 100 qılə kəbini təğribən 27 qılə təloğ bə dumo oqırdıniə bıə. Haliyədə ailon 27 %-i vılo be, bo bənə Az.R mısılmonə məmləkəti ocizanə qıley vəziyyəte.