İ.Əliyevi bə "Dini etiğadə azadi həxədə" ğanuni əvəzon təsdiğ kardışe

Muddəti çimi bə nav Az.R Parlamenti bə "Dini etiğadə azadi həxədə" ğanuni çand qılə əvəz və əlavon kardəşbe. Əvon çımədə ibarət be ki, çimi bə peşt məmləkətədə bə əcnəbion və şəhrıvandəti nıbə odəmon dini mərkəzi tərəfo bedəvət və beicazə dini təbliğat barde ğədəğən bəbe.

Xaricədə dini təhsil sə odəmon  ayin və mərasimon idarə karde bəvədə inkan bədon ki, ey bımi ro çe Ğəfğaz Mısılmonon İdarə və muvafiğ icra hokuməti bahəm icazəş bıbo.  Həmçinin bə xarici məmləkət dini təhsil se ro tələbə vığandeyən icra hakimiyyəti  və dini mərkəzi tərəfo icra bəkarden. "İslamazəri" sayt xəbə dodə ki, iyuni 22-ədə İlham Əliyevi  bə həmonə ğanuni ım əvəz və əlavon təsdiğ kardəşe.

De Dini Təşkilaton əlağədar Devlətə Komitə sədr Mubariz Ğurbanli bəyon kardəşe ki, çimi çə çəton tojə ailon çe devləti tərəfo bə rəsmi ğeydiyyat sə bəpeşt dini xadimon ixtiyar bəbeşone ki, çəvon kəbini bıbıro. Bə ım ğaydə əməl nıkardə, yəni devləti ğeydiyyati nıbə kəbin bıriə din xadimon cəzo bəsen və bə məsuliyyət cəlb bəben. Vırəş heste bıvotım ki, ateistə Şura hokumət bə xalqi dini ayin, adət və ənənon ım ğədər murtəce munasibətədə nıbe.

Şabran şəhəri məçiti soədə qıley atəşsuzi hadisə vağeə bıə. Şəhəri otəşhəmuşəkə xidməti həmkaron vaxtədə ey okuşnie muvəffəğ bıən. Səhəri sakinonku qımon heste ki, ım çe vəhabion təxribate. Çunki əvon bə vəhabion məcitədə ıştə mıjləmon təşkil karde imkan doəşon nıbe, əvonşon çe məçito tojniəbe. Vəhabonən şəhəri imoninə odəmon daim təhdid kardedəbin ki, ım məçiti bəsuten. Şəhəri polis idarə rəsmi şəxsi bə "Sputnik.az" sayti bı barədə parsi çəvobədə ım votəyon təkzib kardəşe.