Az.R-ədə bəşəri huğuğon vəziyyət ce Avropa təşkilaton tərəfo muzakirə bedə

Orəxnə soronədə Əliyevi hokuməti bə şəhrıvandon huğuğ və azadion ğəsd karde, siyasi məhbuson miğdari sorbəsor ziyod be, ısət bə 165 nəfər rəse, çe Avropa huğuğ mudafiə təşkilaton daima diğğəti mərkəzəde.

İyuni 12-ədə AŞPA Monitorinq Komitə həmməruzəçion - Stefan Şennaç və Sezar Florin Preda bə Boku omin. De hokuməti rəsmiyon vindemononədə əvon zindonədə  siyasi məhbuson  marde səbəbi be ğərəz tədğiğ , bı koədə qınokarə odəmon muəyyən karde, KİV və Ğeyri Hokumətə Təşkilaton azad fəaliyyəti ro inkanon bə əməl varde zərurət bə ım devləti məmuron nəzə rosniəşone. Həmməruzəçion tosə iyuni 14 -minə ruji Respublikadə bən, de siyasi məhbusonədə - İlğar Məmmədovi, Səid Dadaşbəyli, Mehman Huseynovi və həniən diqər siyasi məhbuson, həmən de çəvon ailə uzvon didor kardəşone. Həmməruzəcion ıştə ım səfəri həxədə hesabati bə Monitorinq Komitə təğdim bəkarden. Çey muzakirə im sori oktyabrə manqədə dəbəvunien.

İyuni 26 -ədə Fransa Strasburğ şəhərədə de 10 qılə devləti deputaton iştiraki "Avropa Sura daxilədə mətbuati lol karde cəhdon" həxədə qıley məşvərət dəvardə. Reportyoron Azadi və Əmniyyəti İnstituti direktor Emin Huseynov və "Azərbaycan saati" teleproqrami muəllif jurnalist Ğənimət Zahidiən bə tədbirədə iştirakşon bıə. Mehman Ğələndərovi zindonədə tələf bıe, Əfğan Muxtarli çe Tifliso dızdie muzakirə kardəşone. Deputaton votəşone ki, Az.R hokumət ıştə təəhudon bə vırə nırosnie səbəbiku bey munasibətədə muvafiğ tədbiron icra karde vaxt həni omə rəsə.