Hoci Cavad məçiti volo kardey məsələ

Deməkə ki,şiəyon iyən muminon mığovimətışon nışon doe,əmmo nəhoyət Boku şəhri Yasamal rayonu “Hoci Cavad” məçit təxrib be.muminə camaati boçımiro veyə mığovimət nışon doşone,əmmo İlham Əliyevi dıvlət de qıləy milləti əvom hisob kardə formə çı Yasamal rayoni icro hakimış çəy koyku bekardeşe və əmrış karde ki,qıləy co məntəğədə qıləy tojə məçit bısoxton.

Deməkə ki,şiəyon iyən muminon mığovimətışon nışon doe,əmmo nəhoyət Boku şəhri Yasamal rayonu əraziyədə bıə “Hoci Cavad” məçit təxrib be. muminə camaati boçımiro veyə mığovimət nışon doşone,əmmo İlham Əliyevi dıvlət de qıləy  milləti əvom hisob kardə formə çı Yasamal rayoni icro hakimış çəy koyku bekardeşe və əmrış karde ki,qıləy co məntəğədə qıləy tojə məçit bısoxton.

Azərbaycan Respublikə mıstəğil bıey və İlham Əliyevi bə hakimiyyəti sə omey bəpeştə,bə çın dıvləti funksiyə nəzə kardeyədə,vindedəmon ki, Azərbaycan Respublikə hejo  İslom dini həxədə dıdimə siyosətış vıjniyə.joqo ki,har vırədə ıştəni iyən boştə dıvləti təblığ kardero,ıştəni çı dini himoyədor elan kardedə.ım mətləbi oşkoə holətədə Boku çı islomi kişvəron paytaxt elan kardeyədə və  İslomi kişvəron həmrayəti hənəkon mevzuyədə mışohidə kardey bəbe.Azərboyconi dıvlət qıləy çı kontoroli jiyədə bıə islomi tələb kardedə.yəni qədəy hisskəyn ki,qıləy camiyə bo ın rejimi təhdide və çə məçiti odəmon deçəy bardə dini siyosəton həmahənq nin,bilofosilə deəvon co curə rəftor kardedə və həmonə məçiton ya xərob kardedə vəya dəbastedə.

Bə Azərbaycan Respublikə dıvləti de ın aşmardə bıə hərəkaton şiddətinə rəftori formə dığğət kardeyədə,ımi inov bo ın hakimiyyəti çəy vədə bıə qıləy problem hisob kardey bəbe.əve çın rejimi tərəfiku məçiton xərob kardey siyosət vəomədə həm ehtimolış heste və mumkine ijən Azərbaycani hukumət jıqo əmron sadir bıkəy.

Azərbaycani cəmiyyətədə İlhom Əliyevi dıvləti de din iyən dini və iştimayi ozodəti barədə bıə hərəkəton qıləy rəftor qıləy mevzuye ki,həm çı ğərb iyən ğərbpərəston və həmən çı islomi tərəfdoron və çəvon hamiyon məxsusən İron İslom Respublikə dığğəti mərkəzədəy.iminə məsələdə əmə şoydimon ki,ğərbi məxsusən Amerkə iyən Avropə insonə həxon təşkiloton tərəfiku bə Azərbaycan Respublikə dıvləti ələyh bəyoniyyəon sadir bedən ki,ım həm İlhom Əliyevi dıvləti de problemon dim bədim kardedə.

Co tərəfiku əmə şoydimon ki,daxiliku dindoron iyən islomi şəxsiyyəton bə İlhom Əliyevi ələyh etırozon movcude və ımon həmmə bo ın rejimi muşkilaton icod kardedə.Bənə Azərbaycan Respublikə İslom Partiyə rəyis Mehsun Səmədovi bıə islomi şəxsiyyəton əksəriyyəti bə  Azərboyconi zindonon şodey,ım həyğəton bəyon kardedə ki,Azərbayacani millət vey vaxte oğo bıə və ın proses dəvom pəydu bəkay ta çəy əhali əksəriyyətış şiyə bıə Azərbaycan Respublikə cəmiyyətədə ım oğoəti  komilən rəvoc pəyduko.

Binobərin Boku dıvlət çın məmləkəti şiəyon və islomçiyon həxədə bıə siyosət qıləy mevzuye ki,kardey bəzıne çəvonku bo in kişvəri tərəğği iyən çəy işğal bıə ərazi ozodətiro oko bıdəy və əvoni boştə təhdid ne,bəlkəm qıləy fırsət blızıno.boçımiro bəbe Boku dıvlət ıştə islomofobiyə siyosətiku dast bıkəşo və bəbe bəştə ın dastə şəhrvandon həxə tələbon dığğətko.

Azərbaycan Respublikə dıvləti bə çın kişvəri islomçiyon ələyh bıə hərəkəton nışon doydə ki,bəbe bo çın kişvəri muminon mıdofiyə kardero daxilədə qıləy sabit və vahidə ibemon və xaricədə həm islomi kişvəronədə məxsusən şiəyon tərəfiku həmrayəti və həmdıləti lozıme ta çın kişvəri dıvləti bə dini ələyh bıə hərəkəton vəy bıqəto.

Proqnoz kardənin bıə mevzu ımbe ki,Azərbaycani dıvlət “İslomi Kişvəron Həmrayəti Hənəkon” bərpo bıə zəmonədə çı mınoğişə və problemiku bə diyəro qıləy oroməti dumo be.əve cəhdış karde de mumkin bıə har qıləy vositə bə çın kişvəri dıvləti islom və mısılmonəti sima qıləy zərəl nırəso.əve Hoci Cavad məçiti həmonə hənəkon vaxti xərob kardey boyis əbi ki,ım hodisə bə daxili iyən xarici etırozon səbəb bıbu və ım ko Azərbaycan Respublikə dıvləti de problemon vəbəvə əkəy.əve həmonə zəmonədə çın məçiti volo kardey məsləhət nıvindeşone və ım koyışon çı İslomi həmrayəti hənəkon bəpeştə bə təxir eğandeşone.