Boku hokuməti məmuron baməzə hərəkəton

Boku hokuməti məmuron baməzə hərəkəton

Bə əhali sosial problemon diğğət nıdoe, çəvon huğuğon məmuron tərəfo daima darışte, məmuron ıştə vəzifə deni icra nıkarde bo  Az.R içtimai jimoni bə adi qıley vəziyyət peqardə. Isət çəmiyyətədə əhali de məmuron arədə bə məzhəkə oxşəş vəziyyəton rə-rə vağeə bedə.

İnşaat muəssison tərəfo əhali bə dast dənoe, i qılə mənzili bə 5-6 nəfəri həvate fakton barədə Respublika KİV daima nıvıştəşone. Bı cinayətə əməlon qorə qınokarə odəmon çe cəzoku kənoədə mandeyən bə cəmiyyəti çok məlume. Hokuməti ım curə əməlon vəy se ro qıley baməzə təklif bə nav doəşe. "Azadlıq.info" xəbə dodə ki, bə "Əmlak məsəlon dair" Devlətə Komitə mənzilon həvateədə bə dızdə əməlon orəx doe ro bə ğəror omə ki, çimi bəpeşt bina inşa bino karde bə nav, çey mənzilon bə ki mənsub be, navədə bə ğeyd bəsen. Imən quya həmonə məhzili bə diqər şəxson həvate imkan nibədo.

Lankoni şəhristani Tanqəbın nomədə qley di hestışe. Bənə respublika har məntəğon ım diy problimonən həddo ziyode. Diy sakinon ıştə dardon bə "Azadi radio" votəşone. Lankoni İcra  Hakimiyyətiku bə radio muxbiri parsi cəvob doəşone ki, de Lankoni ərazi Avşumə Ro okirnidən. Im proyekt bə orəx rəsə bəpeşt de Tanqəbıni, həmən co dion problemi məşğul be ro imkan peydo bəkarden.

Bakir Bayramov Ğərəboği canqədə şikəst bıə. İştə ailə problemon barədə bə devləti muxtəlif orqanon, məxsusən bə Mehriban Əliyeva xeyli şikayət məktubon vığandəşe. Əmo bey hiç qıley cəvob doəşon ni. İyuni 27-ədə Abşeron Rayoni Polis şebə həmkaron maştə saat 8-ədə omən əvşon bardə bə polis şebə. De tosə saat 4-y vəşi-təşi oğətə bəpeşt vadoəşone. Bey hiç qıley izahatşonən doə ni. Ey bə Azadi radio votəşe ki, həmonə ruji M. Əliyeva bə çəvon ğəsəbə oməybən. Polisonən bənə profilaktik tədbiri əvşon təcrid kardə ki, Bayramovi bə Mehribani pişvaz beşe imkanış nıbo. Bakir Bayramovi bə muxbiri votəşe ki, bı barədə bə Mehriban xanımi şikayət bəkarde.