Nardarani hadisə məhbuson məhkəmədə şohidon ittihami votəyon təkzib kardəşone
De Nardarani hadisə əlağədar dəstqir bıə 2 qrup məhbuson məhkəmə dəvom kardedə. Har 2 qılə məhkəmə iclasədə şohidonku ifadə sedən. Cəvon əksəriyyət prokurori bə məhbuson votə ittihami təkzib kardedən.
"Mısılmonon İbemonə Hərəkati" sədri muavin Elçin Ğasımov və çey 11 nəfər həmməsləkon muhakimədə şohid Hardarani sakin Bəxtiyar Aşurovi votəşe ki, "mınşon kuçədə dəstqir karde, bardışone bə "Bandotdel", məcbur kardışone ki, bə çəvon nıvıştəy ğol bıkəşım. Az besəvodim, hande zındənim. Məcbur mandim ğol kəşeme. Dindar nim. Dini tədbironədə iştirak kardedənim. Im məhbusonədə de hiç kəsiən oşinoətim ni". Diqər şohid Mirkərim Əliyeviən votişe ki, çe Elçin Ğasımovi xutbonədə həmişə iştirak kardəme, əv çe İmom Huseyin (ə) əxlağ və mənəvi aləmi həxədə qəp əjəni. Bə hokuməti əleyh hiç qıley sıxanon nəkey.
Hacı Zulfiğar Mikayılzadə və çey həmməsləkon muhakimədən vəziyyət ım cur bıə. Şoydonədə Əli Nurməmmədov və Mevsum Beydullayevi ifadə doəşone, votəşone ki, istintaği vaxti əvonşon məcbur karde ki, bə mustəntiği nıvəştəy ğol bıkəşon. Taleh Bağirzadə və çey tərəfdaronku hiç vaxt, hiç məclisədə bo devləti peqordınie ro dəvəton məsəşon ni.
AİP sədr Mevsum Səmədov təkrarən bə karser dənoəşone. Çey vəkil Yalçın İmanovi bə "Azadlıq.info" votəşe ki, doktor Səmədoviku Ğıroni ğıley qədə kitobcə heste. Ey ehaşte ro terədə istifadə kardedə. Bə teri qorə bı səfə əvşon 10 ruji muddət bə karser dənoə. Vəkil çe Mevsumi jimoniku bərk norohəte. Votedə ki, ey dumoyəndı bə karser dənoe bə çey jimoni qıley təhdidə plani mevcud be qımoni bə əməl vardedə.
