Silk Way bo terroriston silah kırnidə?
Çe Bolğarıstoni "Trud" rujnomə Az.R Silk Way aviasiya şirkəti bo terroriston silah kırnie barədə məğalə dərc kardəşe. Bı barədə "Utro
ru" sayt nıvıştedə ki, orəxnə 3 sori muddətədə ım şirkəti de "diplomatik reyson" nomi Şərği Avropa məmləkətonku bə dınyo hərbi konflikton mevcud bıə məntəğon silah kirniəşe. Bə ım fakton dair sənədon bə rujnomə jurnalisti Anonymous Bulgaria nominə hakeron dəvuniəşone.
Bə ım sənədon əsasən Silk Way Airlines diplomatik immuniteti jitono de 350 aviareysi vasitə, terroristə İŞİD-ən daxil bə muxtəlif məntəğon de həzo toni silah və hərbi sursaton bardəşe. Bə jurnalisti dast eqıniə ım sənədonədə Az.R Bolğarıstonədə səfarəti de AİŞ, Səudiyyə Ərəbıstoni, Turkiyə, Ərəbiə Əmiraton və bəzi Avropa devləton nıvıştemonon hestin. Im cur "diplomatik reyson" de beynəlxalqə ğanunon təftiş və tənzim bedənin.
Rujnomə həmən nıvıştedə ki, çe ım "diplomatikə reyson" əsas mıştəri Amerika şirkətonin, Silk Way-i bəzi reyson icra karde imkanış nıbeədə ey Azərbaycani Hərbiə Həvo Ğıvvə həvopeymaon əvəz kardedən. 2015-minə sori may 12 -ədə əvon çe Bolqarıstani Burqas və Azərbaycani Nasosnı aerodromiku bə Turkiyə İncirlik hərbiə baza 17 həzo 900 ton silah kırniəşone. Mosuli azad karde bəpeştə çe terroriston silahə amboədə xeyli Bolqarıstani istehsal kardə qranatomet bə oşko beşe .
Silk Way-i əsasə mıştərionədə qıleyən Səudiyyə Ərəbıstone. 2016, 2017-minə soronədə im şirkəti de çey sifarişi 23 qılə jıqo "diplomatikə reys" icra kardəşe və çe Bolqarıstan, Serbiya , həmən Azərbarbaycani "Cihaz" zavodi istehsal kardə silahon bə Ər-riyadi rosniəşe.
