Milli Məclis bə Cinayətə Məcəllə əvəzon bəkarde

De cəzo siyasəti humanist karde məğsədi bə Prezident İlham Əliyevi sərəncami muvafiğ Respublika Ali Məhkəmə, Sər Prokurotura, Ədliyyə və Daxili Koon Vəzarəton bahəm bə Cinayətə Məcəllə əvəzon karde barədə ğanunə layihə hozo kardəşone, bə Milli Məclisşon vığandə.

10 qılə cinayət hərəkəton tərkib dəyqış kardəşone, ovoştoniəşone bə inzibati xəto kateqoriya. Cinayətə məsuliyyəti məbləğ 5 kərə ziyod, çe 100 mənoto bə 500 mənot ros kardəşone. Yəni əqər tosə ısət 100 mənotisən veyə məbləğədə dızdi kardəkəs bə cinayət cəlb bedəbebu, ım ğanun ğəbul kardə bəpeşt dızdi kardə odəmi bə zindon dənoe ro çey kardə dızdi məbləğ bəpe 500 mənotisən vey bıbo.  Bə 80 cinayətə hərəkəton zindonə cəzoku əlavə həmən cərimə, və ya kə dustəğəti cəzo nevon tətbiğ bəkarden.

Daxili Koon Vəzarəti nazir Ramil Usubovi bə "Azərbaycan" rujnomə musahibədə votəşe ki, orəxnə 5 sorədə məmləkətədə 1300 cinayətkarə dastə dəstqir kardəşone. Imən har sor de miyonə hisobi 260 qılə cinayətkarə dastə dəstqir karde nişon dodə.  "Moderator.az" saytən xəbə dodə ki, çe Usubovi iminə muavin Vilayət Eyvazovi ım sori 5 manqədə 536 qılə cinayətkarə dastə dəstqir karde barədə məlumat doəşe.

"Azadlıq.info" nıvıştedə ki, 1993-minə sori Az.R-ədə  de dələdızdiəti ittihami 335 qılə cinayətə fakt bə ğeyd səşon be. 2015-minə sori ım cürə cinayətə fakton 10 kərə vey bıə, bə 3660 - i rəsə.

İm sayt həmən bə "Trend"-i əsasən xəbə dodə ki, Respublikadə bə "Oviku istifadə ğaydon" qıley jıqo maddə əlavə kardəşone: huğuğ muhafizə orğanon bə dini ekstremist qrupon əleyh xususi əməliyyat bardedə, de navədə xəbə doe şərti, həmonə məhəllə ovi təchizati bırnie ixtiyarışon bəbe.