Taleh Bağırzadə və çey həmməsləkon Apellyasiya məhkəmə nimədə mandə

Taleh Bağırzadə bə çey 17 nəfər həmməsləkon ki, çe 10 soriku tosə 20 sori bə zindonə cəzo məhkum bən, Boku Apellyasiya məhkəmə de ım hokumi əlağədar bə çəvon şikayəti diə karde ro iclas dəvuniəşe.

"Azadlıq.info" xəbə dodə ki, ıclasədə xeyli hesıbes bıə. Vəkilon həlok bıə polison - İsmayıl Təğiyev və Vuğar Nəsiboviku rezinə qolulə ğandə silah, ə qılə polison həmeyku otəşinə silah be, çəvon əvlodon, həmən çe Nardarani əməliyyati rəhbər Əlimərdanovi məhkəmədə  bənə şoydi iştirak nıkarde barədə  vəsadəton ros kardəşone. Əmo məhkəmə ım vəsadəton rədd kardəşe.

Vəkilon həmən iddia kardəşone ki, məhkəmədə subut bə ki, çand qılə polisi bə məhkəmə duə ifadə doəşone. Im cinayətə əməle. Əmo tosə ısət bə çəvon munasibətədə cinayətə ko bino kardəşon ni. Vəkilon bə ım cur fakton dair həniən çand qılə vəsadət bə nav doşone, əmo hakimon kolleqiya çəvon hiç qılə təmin kardəş ni.

Vəkil Fariz Namazli və Fəxrəddin Mehdiyeviən bə hakimon votəşone ki, Boku Qonə Cinayəton məhkəmədən çəmə bə nav doə vəsadəton rədd kardedəbin, ısət şımənən eynən bənə bəvon hərəkət kardedəyon. Im 18 nəfər tamamən beqınoə odəmonin. Bəvon qonə işqəncon doəşone ki, əvoni bə ittihamə akti ğol kəşe məcbur bıkon. Polison ıştən ıştə həmkaron və dinc sakinon de qolulə jəşone. Şımə çe Xıdoku bıtarsən. Tosə ısət hiç kəsi Xıdo vədə çe məsuliyyətiku ıştənış bə kəno noe zınəni.

Məhkəmə hakimonədə Əflatun Ğasımov bə məhbus Rasim Cəbrayılovi munasibətədə kobudəti kardəşe. İmən bə muttəhim tərəfi odəmon etirazi səbəb bıə. Əvon Ğasımovi məhkəmə tərkibo bekarde tələb kardəşone. Hesıbes eqıniə, məhkəmə iclasi dəvom karde həni mumkun bıə ni. Məhkəmə tosə iyulə manqi 20-i bə təxir eğandəşone.