Benzini ğıyməti boho be səbəb çiçe

Az.R Tarif, (yəni ğıymət) Şura iyuli 14-də iclas dəvuniəşe, bə ADNŞ muraciəti əsasən çey " ixrac imkanon məhdud be və valyuta mədaxilon bə kam be" bə nəzər seşe, məmləkətədə Aİ-92 marka benzini 1 litri ğıymət bə 90 kopiq ros kardışe.

Şura ıştə bı ğərorədə həmən bə əhali jıqo qıley dılvandi doşe ki, Respublikadə benzini ım marka ğıymət postsovet məkani və reqioni əksər məmləkətonsə erjonə səviyyədey.

İğtisadşunasə eksperton vahid fikir jıqoe ki, ısətnə vəziyyətədə bə benzini ğıyməti ziyod karde ehtiyac nıbe və ım əməl Azərbaycani çe iğtisadi behraniku xilas nibəkarde. Im ğıymət ziyod karde "Sokari" bədxarciəti əvəzi çe xalqi cifo bekarde məğsədış heste.

"Azadlıq.info" çe Ğobad İbadoğlu məğalə dərc kardəşe. Çey fikir jıqoe ki, Tarif Şura ım ğəror nəğliyyat sahədə həmə xidməton ğıyməti boho bəkarde. Bə ım Şura votəyon əks 92-marka benzini ğıymət reqioni devlətonədə -  İronədə 34 sent, Bəhreynədə 42,  Omanədə 47, İbə Ərəbiə Əmiratədə 48, postsovet devlətonədə - Ğəzəxıstanədə - 44 sent, Turkmənistanədə 27, Az.R -ədə isə 53 sente. İğtisadşunas Revşən Ağayev isə benzni ğiyməti ros karde səbəbi bənə diqər devlətə muəssison "Sokar"ədən korrupsiya və ğeyri-şəffafə əməlon nəticədə xeyli vəsaiti dələmurd kardedədə vindedə.

Az.R Maliyyə Vəzarəti bə 2017-minə sori 6 manqi dair devlətə budcədə 471 milyon mənot defisit, yəni nırəsəy bə əməl ome elan kardəşe. Çimi mənan əve ki, devləti xarcon çe mədaxilisən anədə vey bıə. Hejo jıqo vəziyyəti nəticəy ki, Verqi Vəzarəti repitetor muəllimon bə verqi cəlb karde barədə ğəror ğəbul kardəşe. Əmo xeyli şirkəton bə devlətə budcə verqi avjor nıkarde barədə bə muxalif mətbu vasiton doə məlumaton nə ım vəzarət, nəən ki, devləti diqər əlağədar təşkilaton hiç qıley əncom kəşedənin. Zuşon yəğin i qılə bə repetitor muəllimon vışkidə.