Məmuron ıştənbəsəti səbəb çiçe

Prezident İlham Əliyevi iyuli 12-ədə bə məmləkəti sosial - iğtisadi inkişafi dair Naziron Kabineti iclas dəvunişe. Əyo ıştənbəsəti kardə, ıştə ailə uzvon idarə karde nızınə məmuron munasibətədə sərt tədbiron vinde barədə ıştə navkonə fikron təkrar kardışe.

"Azadlıq.info" prezidenti orəxnə 5 sorədə bı həxədə votə fikron sitat vardəşe. Hətto 2013-minə sori fevrali 12-ədə votəş be ki, "az bə ım çurə məmuron orəxnə səfə xəbərdarəti kardedəm".

Əmo respublikadə bı 5 sorədə ım vəziyyət çoko hestbe, jəqoən mandə. Məmuron bə şəhrıvandon tələbi quşələxə kardedən, rışvə sedən, çəvon əğılon ğodurəti kardedən, bə cinayətə hərəkəton mubaşir bedən. Bı rujonədə Bə Hərbi Dəvət Devlətə Komitə sədri muavin qeneral -mayor Nəvuzəli Orucvi zoə təkrarən bə cinayətə hərəkəti ro doe, Respublika KİV-onədə bə muzakiron səbəb be. Məlum be ki, əv daima de avtoxuliğanəti məşğule, 2014-minə sori de maşini qıley piyodə odəm jəşe kıştəşe. Bı qonə cinayəti ro cəmi bə 4 sor muddət məhkum bıə, 2016- minə sori çe zindono vadoəşone. Iştə xuliğanəti dəvom kardəşe. Polisi tərəfo çe şoferə vəsiğəku, yəni avtomobil rome huğuğiku məhrum be əhəmiyyət doəş ni. İyuli 3-minə ruji ro hərəkətə ğaydon darıştəşe, qıley avtobusi şoferış kuə. Im məsələ de şə bə Prezidenti quş rəsə, ey həmonə qeneral çe koyku beğandəşe. "Vesti.az" sayt nıvıştedə ki, vəzifədarə odəmon evladon bə ictimai ğaydə-ğanunon beetina munasibət şe-şe bo cəmiyyəti bə qıley problem peqardedə. Sayt bı çimi dair xeyli fakton misal vardəşe.

 Tam oşkoe ki, ım ictimai bəlo əsas səbəb məmuron bə vəzifə de kulliən rışvə muğabilədə təyin beədey. Çimiən məna əve ki, har qıley məmur ıştə vəzifə de puli hıridə, bə səbəbən çe vəzifə səlahiyyətiku bəştə şəxsi və ailə mənafe istifadə kardedə, çəvon əğılonən jıqo ailə muhitədə perəse səbəbiku bə cəmiyyəti ğanunon məhəl nodənin. Jıqo dərəbəqiəti bo de ğanuni idarə nıbə cəmiyyəti xarakterik qıley vəziyyəte.