Az.R-ədə rışvə doəkəson miğdar rışvə səkəsonsən veyebən

İyuli 17-minə ruji Respublika Sər prokurori muavin, bə Korrupsiya Əleyh Mubarizə İdarə rəis Kamran Əliyevi mətbuatə konfrans dəvunişe, ımsornə 6 manqədə de korrupsiya mubarizə nəticon elan kardışe.

Çey voteku məlum bə ki, ım muddətədə de rışvə doe əlağədar cinayətə fakton çe rışvə se faktonsə vey bə. Iştənən ğeyri-devlətə muəssisonədə ım cinayətə hərəkəton bəsə devlətə muəssisonsə ziyodin. De rışvə əlağədar bank sektorədə 19, təhsil sahədə 10, sosial mudafiə sahədə 3, icra hakimiyyətədə 4, kemruk sahədə 1 qılə cinayətə ko bino kardışone.

Huğuğşunas Əliəsqər Məmmədli bə Meydan TV votəşe ki, devlətə təşkilatonədə vəzifədaron bo rışvə se ro imkan və səlahiyyətonşon veye, çəvon ıştə səlahiyyətonku sui-istifadə karde devlətə strukturonədə bo rışvəxorəti munbitə zəmin bə əməl vardedə. İğtisadşunas Natiğ Cəfərliən çe Kamran Əliyevi votəyon tənğid kardəşe ki, korrupsiya 2 tərəfinə bedə. Ğeyri-devlətə təşkilaton adətən bə devlətə orğanon rışvə dodən ki, ıştə muəyyən problemon həll bıkon. Ğeyri-devlətə təşkilaton daxilədə ıştən bəştə rışvə doe mumkun nıbə koe. 

Həmən ğeyd karde zərurie ki,  "İcra hakimiyyəti həxədə əsasnamə" rayoni həmə huğuğ muhafizə orğanon bə rayoni İcra hakimiyyəti sərdari tabe kardəşe. Imiən realədə bə jıqo qıley vəziyyət vardəşe ki, əqər rayonədə mustəntiği bə qıley məmuri munasibətədə cinayətə ko bino kardeş bıpio, bımi ro bəpe çe həmonə rayoni Sərdariku icazə bısəno. Jıqo qıley ğeyri-normal vəziyyətədə, əlbəttə Kamran Əliyevi votə rəğəmon bə devlətə təşkilaton xeyr bəbe, korrupsiyadə qınokaronən, yəni rışvə doeədə mığəssironən hejo sodə şəhrıvandon ıştən bəninin.