Az.R iğtisadiyyatədə behrani dəvom karde
Az.R iğtisadiyyatədə behrani dəvom karde muxtəlif subyektiv səbəbon hestışe. Isət hokumət budcə nırəsəy de əhali səpe verqiə tələbon ziyod, məhsul və xidməti ğıyməton boho karde roy çe arə bardeş pidə. Hərcənd ki, respublikadə çanədə şirkəton hestin ki, çe Verqiə Vəzarəti nəzarətiku təmom kənoədə mandedən, və bə devlətə budcə verqi avjor kardedənin.
Məmləkəti Umumdaxili məhsuli 67 % "nısoə iğtisadiyyati" təsiri jitotoe, yəni ım ğədər məhsulən bə vergi cəlb bedəni. Bə devlətə budcə çand milyard mənot ziyan qınedə.
"Maidə.az" bə "Exo" rujnamə əsasən nıvıştedə ki, Respublika vıjori məhsuli 25 % de kontrabanda roj bə məmləkət idxal bedə. Azadə İstehlakçion İbemoni sədr Eyyub Huseynov votedə ki, "hokuməti de ğeyri-leqal idxali mubarizə besəmər mandedə. Əmə hakənə bə iştisad Vəzarəti və Kemryqə Komitə ım fakton barədə konkret məlumaton dodəmon. Əmo ımi hiç qıley nəticəş bedəni, orəxnə soronədə vıjorədə ım cur məhsulon miğdar həniən vey bedə".
Bı rujonədə Təği Əhmədovi rəis bə vaxton Boku metropolitenədə devləti vəsaiti kullən dızdiə fakton bə oşko beşe. "Korrupsiya.az" saytən xəbə dodə ki, Metropoliten Səhmdar Cəmiyyəti 2015-minə sori zərər 28, 3 milyon mənot be. 2016-minə sori həmonə zərər ziyod bıə, bə 78,7 milyon mənoti rəsə. Devləti tərəfo har sor bə ım muəssisə 38 milyon mənot subsidiya dodən. Əmo ım jıqo qonə vəziyyətiku xilas kardedəni. Imsornə subsidiya 8 milyon kam - yəni 30 milyon mənot be səbəbiku Metropoliteni çe krizisiku bekarde ro bo sərnişinon jetoni puli bə 30 kopik ros karde nəzərədə qətedən . Bımi ro ehtimal heste ki, bə Tarif Şura muraciət bıvğandon.
